03/06/2024
Biddacidru. Bussas de Istúdiu Natzionalis po s'annu de Iscola 2023/2024 – Inghitzu de su protzedimentu.
Si avisant is sugetus interessaus chi, cun Determinatzioni de su Servítziu Istrutzioni Púbblica reg. gen. 384 de su 31 de Maju 2024, est inghitzau su protzedimentu amministrativu po s'atribbutzioni de sa Bussa de Istúdiu Natzionali cunformas a su D. Lgs. 63/2017 po s'Annu de Iscola 2023/2024. Sa Bussa de Istúdiu est destinada a is istudiantis residentis in Biddacidru chi, po s'annu de iscola 2023/2024, risultant iscritus e ant frecuentau s'Iscola Segundària de II gradu (est a nai Iscola Superiori – Istatali o Paritària). Sa domanda de partetzipatzioni tocat a dda presentai aintru e non prus a tradu de cenàbara 28 de Làmpadas 2024 segundu una de is maneras inditadas in s'Avisu Púbblicu chi agatais in su giassu istitutzionali: https://www.comune.villacidro.vs.it/
03/06/2024
Biddacidru. Inghitzaus is trabballus de restàuru de sa Crésia de Santu Sisinni.
Noba e fotografia pigada de su giassu: "La Gazzetta del Medio Campidano". Est inghitzau su restàuru de sa Crésia de Santu Sisinni abetau de tempus meda. Is trabballus previdint de torrai a fai sa lolla, cambiendi is partis in linna dannegiadas, torrai a ponni sa cannitzada e fai s'impermeabbilizatzioni e de aconciai sa cobertura in téula sarda. "Gràtzias a s'impénniu de s'Amministratzioni e de is Servítzius Técnicus e Amministrativus de su Comunu – ispricat su Síndigu, Federico Sollai – eus tentu unu finantziamentu de 90.000 éurus, po torrai a avalorai unu de is monumentus identitàrius de Biddacidru prus bellus e eciseris chi si agatat in su parcu de is ollastus secularis intra de is prus eciseris de su Mediteràneu. Eus a sighiri cun fortza a avalorai is bellesas naturalis de su territóriu e su patrimóniu istóricu-culturali nostu". S'interventu interessat sa lolla e sa fatziada de sa Crésia de sartu de Santu Sisinni: "Custu progetu – aciungit su Síndigu – nascit de un'impèllida forti de custa Amministratzioni chi si est móvia, giai de su primu momentu de s'aposentamentu suu, po agatai su dinai netzessàriu po fai is trabballus in sa parti prus dannegiada de s'istrutura. Po nosu e po totu sa comunidadi cirdesa, sa Crésia tenit unu caràtiri identitàriu forti e unu valori istóricu inestimàbbili. Credeus chi dda preservai e dda avalorai, no isceti in is festas religiosas cun traditzionis de prus de cent'annus, potzat agiudai a dda fai bessiri unu de is logus cun magiori atratividadi de su territóriu nostu". Sa Crésia de Santu Sisinni, tanti cara a is cirdesus, s'agatat in unu logu eciseri cun unu valori ambientali diaderus únicu in su generi suu in totu su Mediterràneu.
03/06/2024
Seddori. Vacàntzias de s’istiu 2024.
Su Comunu de Seddori fait sciri chi is atividadis po is pipius e is pipias si faint in is mesis de Argiolas e Austu 2024 e s’ant a fai in diis e oràrius diferentis sighendi s’edadi de is pipius. Podint partitzipai pipius e pipias,piciocus e piciocas a partiri de is 3 annus fintzas a 16 annus, chi bivint in su Comunu de Seddori: “Spàtziu Pipius” (de is 3 a is 5 annus) “Giogaus Impari” (de is 6 a is 10 annus) “Piscina e dii in sa Plaja” (de is 11 a is 16 annus) Is dimandas si depint presentai in s’ Ufítziu Prísia (Ufficio Protocollo) de su Comunu de Seddori abertu totus is diis de is oras 10:30 a is oras 13:00 e su mérculis a merì de is oras 16:00 a is oras 17:30 o si podint imbiai a is indiritzus: Pec: protocollo@pec.comune.sanluri.su.it E-mail: protocollo@comune.sanluri.su.it A intru e non prus atesu de su 14 de Làmpadas 2024. Donai atentzioni chi si podit partitzipai a is atividadis sceti chi si pagat antitzipatamenti sa cuota de s’iscritzioni. Po informus e spiegatzionis cuntatai is “Serbítzius Sotzialis e a sa Persona” chi s’agatant in bia A.R. Biddasanta 17 a su númeru 070/9383308 e/o imbiai una mail a is indiritzus: g.porru@comune.sanluri.su.it – e.saruis@comune.sanluri.su.it Is dimandas imbiadas a is indiritzus mail innoi in pitzus non funt ballidas. Su responsàbbili de su protzedimentu est s’ Istr. Amm.vu Giuseppi Porru - tel.070/9383308
03/06/2024
Seddori. Casteddu Mediuevali.
A partiri de su 1 de Làmpadas is oràrius de is bísitas ghiadas de su Casteddu de Seddori cambiant
Innoi asuta is oràrius nous de totu sa cida: Lunis: serrau Martis: de is oras 10:00 a is oras 13:00, a merì de is oras16:00 a is oras 19:30 Mérculis: de is oras 10:00 a is oras 13:00, a merì de is oras16:00 a is oras 19:30 Gióbia: de is oras 10:00 a is oras 13:00, a merì de is oras16:00 a is oras 19:30 Cenàbara: de is oras 10:00 a is oras 13:00, a merì de is oras16:00 a is oras 19:30 Sàbudu: de is oras 10:00 a is oras 13:00, a merì de is oras 16:00 a is oras 19:30 Domínigu: de is oras 10:00 a is oras 13:00, a merì de is oras 16:00 a is oras 19:30
31/05/2024
Sàrdara. Serbítziu lùdicu po s’ istiu.
Su comunu faiti sciri chi de su 23 de Maju 2024 funt abertas is iscritzionis po is serbítzius lùdicus-ricreativus comunalis: “Ludoteca de s’ istiu”, iscadèntzia presentazioni domandas su 6 de Làmpadas 2024. “Baby planet”, iscadèntzia presentatzioni domandas su 14 de Làmpadas 2024. Ligi sa noba innoi: ➡️ http://www.comune.sardara.su.it/.../Avviso-apertura.../ #sardara
31/05/2024
Sàrdara. Cursu de ginnastica durci.
S’amministratzioni comunali in s’ ambitu de is políticas po favoressi is antzianus autusufitzientis promovidi unu cursu de ginnastica durci po is personas chi tenint 60 annus o prus. Su cursu est cuncordau po is personas chi tenint 60 annus o prus cun su scopu de fai movimentus a manera de essi prus muxaditus in sa vida fitiana e po anticipai e curai maladias a carrigu de su sistema ossosu-articolari e muscolari. Su serbítziu cumprendit duas letzionis a sa cida chi durant una ora e de aici po cincu mesis. Sa prioridadi po su serbítziu si donata a is chi tenint prus de 65 annus e a chini s’annu passau non at pótziu gosai de su cursu. Is atividadis funt fatas in collabboratzioni cun s’ “Asd Forma e Fitness” de Sàrdara (viale dei Platani 95). Po is informus tzerriai a su 0709387559 o su 0709387105 Serbítzius sotzialis in is diis de abertura a su pùbblicu: su Lunis a is oras 15:30-17:30 e su Martis e sa Gióbia a is oras 11:00-13:00.
30/05/2024
Santu 'Èngiu. Unu bandu po torrai a aberri su Museu Duas Funderias.
In s'Albo Pretóriu de su Comunu de Santu 'Èngiu, cun su Númeru de Pubblicatzioni 451, est istétiu pubblicau s'avisu púbblicu e sa modulística chi riguardat s'achirimentu de sa manifestatzioni de interessamentu po pigai in gestioni su Museu Duas Funderias cun cuntzessioni de is aposentus atzessórius in comodatu a indonu. Po partitzipai a s'avisu, dónnia sugetu interessau depit presentai sa domanda chi depit lompi a s'Ufítziu Protocollu de su Comunu de Santu 'Èngiu, in bia Trento 2, a intru e non prus a tradu de sa una (h. 13:00) de su 13 de Làmpadas 2024. Informatzionis e modulística si podint iscarrigai de su giassu de su Comunu de Santu 'Èngiu.
30/05/2024
Santu 'Èngiu. Progetu Iscéntzias: inghitzat s'annoamentu in s'Educatzioni Iscientífica in Sardigna.
Noba pigada de su giassu: sangavinomonreale.net Is datus INVALSI de su 2021 ant fatu bessiri a pillu chi in Sardigna iscéti su 46% de is discentis de s'Iscola Média sodigat is tareas matemàticas pedidas contras a su 54,8% de su datu natzionali. Un'analisi prus a sa minuda at iscerau is comunus de su territóriu sardu innui si registrat unu gradu de achirimentu de cumpeténtzias prus bàsciu de is médias natzionalis, pruschetotu in is matérias STEM ( Science, Technology, Engineering Mathematics). Unu discenti a suba de duus sodigat is livellus médius de cumpeténtzia in is matérias matemàticas invécias in is iscolas superioris est isceti su 15,7%. De custu apretu nascit Iscéntzias ( in Língua Sarda Matérias Iscientíficas), unu progetu iscioberau de "Con i bambini" in s'àmbitu de su Fundu po su cuntrastu de sa poburesa educativa minorili e finantziau de "Con i Bambini" paris cun "Fondazione CDP". Su progetu Iscéntzias est una proposta innovativa po prummovi s'educatzioni iscientífica in is iscolas sardas po médiu de metodologias innovativas che a sa "gamification" e s'aina digitali "STEAM Trail". Is iscolas chi ant acunsentiu a su progetu funt: su "Istitutu Cumprensivu Statali "E. Puxeddu" de Biddesorris- Nuràminis e s'Istitutu Cumprensivu "Eleonora s'Arborea" de Santu 'Èngiu – Sàrdara. De unas cantu cidas est acabbada sa formatzionis de is insenniantis e de is operadoris sotzialis; su progetu Iscéntzias duncas est inghitzau cun sa punna de cambiai de unu totu s'educatzioni iscientífica in is iscolas sardas. Po médiu de garas, "quiz" e giogus de iscuadra, is istudiantis funt incoraus a isvilupai cumpeténtzias traversalis cumenti a sa risolutzioni de is probblemas, sa collabboratzioni e sa creatividadi, chi funt de fundamentu po afrontai is isfidas de su mundu cuntemporàneu. Iscéntzias interessat in manera ativa is iscolas localis, is insenniantis e is famíllias insoru gràtzias a sa collabboratzioni de is alleaus in su progetu: s'Enti cabufila " Cooperativa Sociale Koinòs", Comunu de Santu 'Èngiu (SU); Comunu de Sàrdara (SU); Comunu de Serramanna(SU); "Fondazione Terres de Hommes Italia ONLUS"; Istitutu Cumprensivu Statali "E. Puxeddu" de Biddesorris – Nuràminis; Istitutu Cumprensivu Statali "Eleonora d'Arborea" de Santu 'Èngiu- Sàrdara; "La Fabbrica Spa"; "Associazione STEAM";"IUSTO – Istituto Universitario Salesiano Torino Rebaudengo". Su progetu Iscéntzias sighit is istudiantis in is tres annus de s'Iscola Média e si impénniat a preparai una generatzioni noba de tzitadinus ativus e cumpetentis in su mundu de is isciéntzias. Totu is piessignus de su progetu funt disponíbbilis in su giassu: https://percorsiconibambini.it/iscentzias/
30/05/2024
Seddori. Ispetàculu teatrali “Sa creatzioni”. Teatru “Akinu Còngia”. 7 de Làmpadas 2024.
Su Comunu de Seddori fait isciri chi is istudiantis de s'Iscola Primària de S'istitutu Cumprensivu de Seddori ant apariciau s'ispetàculu teatrali in língua sarda “Sa creatzioni” chi si fait su 7 de Làmpadas 2024, in su teatru “Akinu Còngia”, h. 17:30 S'ispetàculu est riservau a is babbus, mammas e parentis de is pipius. S'ispetàculu est su trabballu finali de su labboratóriu“ Sa creatzioni” chi su regista Piero Marcialis, cun s'agiudu de s'Ufítziu de Língua Sarda de su Comunu de Seddori, at fatu in s'Iscola Primària. Su labboratóriu e s'ispetàculu teatrali faint parti de is Atividadis Culturalis in Língua Sarda de su Progetu “Terras de Marmilla Linas e Campidanu” finantziau cun su dinai de sa Regione Autònoma de Sardigna cunformas a sa L. 482/99 e a sa L.R. 22/2018.
30/05/2024
Mara Arbarei. Oràriu Biblioteca Comunali po s’istadi 2024
S’Unioni Comunus de sa Marmidda, su Sistema Bibliotecàriu Marmidda e sa Biblioteca Comunali de Mara Arbarei faint sciri ca de su 1 de làmpadas a su 31 de austu 2024 sa biblioteca aberrit cumenti sighit: Martis de is 17:00 a is 20:00 Mèrcuris de is 17:00 a is 20:00 Giòbia de is 09:30 a is 12:30 Cenàbara de is 17:00 a is 20:00 In prus s’arregodant su nùmeru de telèfunu e WhatsApp 07093069317 e s’indiritzu e-mail biblio.villamar@gmail.com po calisisiat duda.
.jpg)
30/05/2024
Seddori. Ispetàculu teatrali “Sa creatzioni”. Teatru “Akinu Còngia”. 6 de Làmpadas 2024.
Su Comunu de Seddori fait isciri chi is istudiantis de s'Iscola Primària de S'istitutu Cumprensivu de Seddori ant apariciau s'ispetàculu teatrali in língua sarda “Sa creatzioni” chi si fait su 6 de Làmpadas 2024, in su teatru “Akinu Còngia”, h. 10:30. S'ispetàculu est riservau a is piciocheddas e piciocheddus de is Iscolas. S'ispetàculu est su trabballu finali de su labboratóriu “ Sa creatzioni” chi su regista Piero Marcialis, cun s'agiudu de s'Ufítziu de Língua Sarda de su Comunu de Seddori, at fatu in s'Iscola Primària. Su labboratóriu e s'ispetàculu teatrali faint parti de is Atividadis Culturalis in Língua Sarda de su Progetu “Terras de Marmilla Linas e Campidanu” finantziau cun su dinai de sa Regione Autònoma de Sardigna cunformas a sa L. 482/99 e a sa L.R. 22/2018.
30/05/2024
Mara Arbarei. Agitòriu! Arribat su lupu!
S’Unioni Comunus de sa Marmidda, su Sistema Bibliotecàriu Marmidda e sa Biblioteca Comunali de Mara Arbarei cuncordant po cenàbara 31 de maju 2024, ora de is 16:00, un’atividadi po is pipius de sa scola de s’infàntzia. Non serbit a s’iscriri, bastat acostai a biblioteca a s’ora de s’atividadi. Bandai-ddoi in medas! Po ndi sciri de prus: tel. 07093069317 e-mail biblio.villamar@gmail.com
28/05/2024
Mara Arbarei. Labboratóriu de animatzioni po s’istadi 2024
S’Unioni Comunus de sa Marmidda, su Sistema Bibliotecàriu Marmidda e sa Biblioteca Comunali de Mara Arbarei in collabboratzioni cun s’Ufìtziu Lìngua Sarda de Mara Arbarei ponint in peis su Labboratòriu de Animatzioni “Micromondo” po s’istadi 2024. Podint pigai parti pipius e piciocus de sa scola primària e segundària de I gradu chi, in ses atòbius, ant a tenni sa sorti de connosci su mundu de is babballotis. Is iscritzionis funt abertas giai de su 15 de maju 2024 e s’arricint in òrdini de arribbu fintzas a su 31 de de custu mesi. Po ndi sciri de prus: tel. 07093069317 e-mail biblio.villamar@gmail.com
28/05/2024
Biddacidru. Incingiadura Campu Isportivu de bia Stazione – 5 de Làmpadas 2024
#insiemepervillacidro Su Comunu de Biddacidru, in collabboratzioni cun is Assótzius Isportivus localis, fait isciri chi mércuris 5 de Làmpadas 2024 ddoi est s'incingiadura de su campu de fúbbalu annoau de bia Stazione. A pustis de sa tzirimónia de sa segada de su nastru prevídia po is ses de a merí (h.18:00), ddoi est unu Torneu de Fúbbalu Giovanili. Totu is cirdesus funt cumbidaus a partitzipai.
28/05/2024
Biddacidru. Labboratóriu “Il piccolo cittadino sostenibile”. Funt abertas is iscritzionis.
Su Sistema Bibliotecàriu "Monti Linas", in su cuntestu de sa prummotzioni a sa letura, fait isciri chi su 14 de Làmpadas, in sa Biblioteca Comunali de Biddacidru, h.15:30 – 18:30, si fait su labboratóriu creativu chi interessat is pipias e is pipius de is 7 a is 10 annus. In su labboratóriu faint a biri unu filmau asuba de sa sustenibbilidadi e, po médiu de su giogu, is pipius funt guidaus in unu percursu chi punnat a ddis ispricai cali funt is cumportamentus de unu tzitadinu rispetosu de s'ambienti. Is iscritzionis si podint fai de su 31 de Maju a su 12 de Làmpadas 2024.
27/05/2024
Mara Arbarei. Bandu de Cuncursu- Istrutori de Vigilàntzia
Si fait sciri a totus is chi ddu tenint agradèssiu ca fintzas a su 10/06/2024 si podit pediri de pigai parti a is esàminis de sa seletzioni pùbblica po coberri a tempus prenu e non determinau duus incàrrigus de Istrutori de Vigilàntzia. Funt: n. 1 in su Comunu de Mara Arbarei n. 1 in su Comunu de Samassi Po essi amìtius tocat a tenni -su Diploma de istrutzioni segundària de segundu gradu chi permitit de intrai a s’universidadi; -sa patenti de ghia B e A (chi permitat de ghiai motociclus de calisisiat cilindrada e potèntzia) o sceti sa patenti B po is chi dd’ant pigada primu de su 26/04/1988. Po mandai sa domanda tocat intrai in su Portali ùnicu “InPA” disponìbbili a s’indiritzu www.inpa.gov.it. Cun su servìtziu PagoPA invècias si podit pagai s’iscritzioni a su cuncursu.
27/05/2024
Mara Arbarei. Agiudus econòmicus po comporai o ponni a postu is primus domus me is comunus cun prus pagu de 3.000 residentis. Pubblicatzioni Bandu Annualidadi 2024.
Cun custu Avisu si fait sciri ca cun Determinatzioni de su Responsàbbili de su Serbìtziu àrea tènnica n. R.G. n. 385 de su 30.04.2024 est aprovau su Bandu apitzus de s’agiudu in ogetu po s’annualidadi 2024 cun is inditus po pediri su dinai. Su contribbutu coberrit fintzas a su 50 po centu de sa spesa e, a ònnia manera, no est prus de 15.000 èurus po domanda. Si podit pediri po: a)Comporai sa primu domu in su territòriu de Mara Arbarei; b)Fai trabballus de edilìtzia po ponni a postu sa primu domu in Mara Arbarei, cumenti ponit s’art. 3, lìtera d), comma 1, de su DPR n. 380 de su 6 làmpadas 2001; c)Comporai o ponni a postu sa primu domu in Mara Arbarei sèmpiri aintru de 15.000 èurus; S’istàntzia de contribbutu, po chi ballat, depit lompi intru de sa una de su 31 maju 2024 cumenti ddoi est scritu in su Bandu 2024 e in is mòdulus pubblicaus in su situ istitutzionali de su Comunu de Mara Arbarei Su Responsàbbili de su Procedimentu, Ing. Giovanni Sanna
25/05/2024
Biddanoa de Forru. Abbisita a indonu a su Museu e su Nuraxi “Genna Maria” e Labboratóriu de ceràmica. 15 de Làmpadas 2024.
In su cuntestu de is Atividadis Culturalis in Língua Sarda de su Progetu Terras de Marmilla Linas e Campidanu, s'assótziu Sarditinera, in collabboratzioni cun su Parcu e Museu "Genna Maria" de Biddanoa de Forru, organizat, po sàbudu 15 de Làmpadas 2024, un'abbisita ghiada a su Nuraxi e a su Museu “Genna Maria” de Biddanoa de Forru e unu Labboratóriu de Ceràmica cun sa M.a Roberta Cabiddu. Is billetus e su labboratóriu funt a indonu est a nai chi no si pagant est a nai chi su billetu non si pagat. Is atividadis funt destinadas a unu màssimu de 30 personas. Su logu de atóbiu de is partitzipantis est a in antis de su Museu Archeológicu "Genna Maria", Pratza Costituzione 4, h. 10:00. Si inghitzat a mengianu cun su labboratóriu de ceràmica e si sighit cun s'abbisita a su Nuraxi, a merí , h. 15:00 si fait s'abbisita a su Museu. Su cumbidu interessat non scéti a is chi bivint in is Comunus chi funt sea de is ativividadis de su Progetu: Seddori (Cabufila), Biddacidru, Gùspini, Biddanoa de Forru, Santu 'Èngiu, Mara Arbarei, Samassi, Serrenti, Sàrdara, Pabillonis, Lunamatrona e Futei ma totus is tzitadinas e is tzitadinus chi, mancai residentis in àterus comunus, bolint passai unu merí a s 'iscoberta de is bellesas e de is iscusòrgius de custu territóriu. Po partitzipai tocat a si prenotai mandendi una e-mail a: a.caboni@comune.sanluri.su.it o carla.asunis@gmail.com opuru mandendi unu messàgiu WhatsApp a su númeru 3890191709 Po si prenotai ddoi at tempus fintzas a sa una (h. 13:00) de su 12 de Làmpadas 2024. S'Abbisita a su Museu, a su Nuraxi e su Labboratóriu de Ceràmica funt a indonu (gratis), ca faint parti de su progetu "Terras de Marmilla Linas e Campidanu" finantziau cun su dinai de sa Regione Autònoma de Sardigna cunformas a sa L. 482/99 e a sa L.R. 22/2018.
24/05/2024
Gùspini. Animatzioni istadiali 2024 in Biblioteca
Ocannu puru sa biblioteca comunali “Sergio Atzeni” de Gùspini, (impari a is bibliotecas de Arbus, Gonnos, Pabillonis, Sàrdara, Santu ‘Éngiu e Biddacidru, chi totus faint parti de su Sistema Bibliotecàriu Monti Linas) proponit unu percussu de animatzioni istadiali cun Labboratórius de Leturas Animadas po piciocheddus de is 7 a is 13 annus. Si faint 6 atóbius a mengianu, su martis e su cenàbara, de sa durada de un’ora e mesu donniunu in is datas de su 18, 21, 25 e 28 de Làmpadas, 2 e 5 de Meseargiolas. Is piciocheddus s’ant a pratziri in duas trumas cun unu màssimu de 10 partitzipantis donniuna. Po informus in prus e po si prenotai tocat a cuntatai sa biblioteca a su númeru 070 9760125.
24/05/2024
Gùspini. Presentada de su líbburu “Mommoti”
Sa Biblioteca Comunali “Sergio Atzeni” de Gùspini cenàbara su 7 de Làmpadas a is 6 de a merí (18.00), stràngiat is autoris Luca Spissu e Mauro Fais chi presentant su romanzu insoru chi contat de un’acontéssiu de crònaca introbeddau chi andat de su 1935 a su 1975, in sa Sardigna prus sintzilla e prus pagu connota. "Mommotti" est su títulu de su líbburu, unu contu interessanti diaderus e patidori ma cun unu pagu de ispera. Presentat la serada s’assistenti de biblioteca Cristina Saba. Ciaciarrat cun is autoris Giada Cherchi.
24/05/2024
Pabillonis. "Nella testa degli adolescenti risiede un tesoro"
Su Comunu de Pabillonis, in su cuntestu de is Serbítzius Sótziu-Educadoris distretualis de su PLUS de Gùspini, gestius de su Consórtziu Network cun sa Cooperativa Alfabeta, aparíciant "Nella testa degli adolescenti risiede un tesoro", acontéssiu rivólgiu a babbus e mammas, maistus e educadoris, a incuru de Paolo Mai, Académia Pedagogia Viva, su 20 de Làmpadas 2024 de is 5 e mesu a is otu e mesu de a merí (17.30 - 20.30), in is aposentus de su Tzentru de Agregatzioni Sotziali in bia Su Rieddu, n. 1. Po informus tzerriai a Monia 388 5825715 3281671923
.jpg)
24/05/2024
Serrenti. Presentada de su líbburu “Alla Terra i miei occhi” de Mauro Liggi
S’apuntamentu nou de “Librus e Lollas” in Serrenti est cenàbara su 24 Maju 2024 a is 7 de a merí (19.00) in su Parcu de Monti Crastu innui est su Pinnetu Lisci Ennas. Custa borta s’istràngiat Mauro Liggi chi presentat su líbburu suu nou de poesias intitulau “Alla Terra i miei occhi”. S’acontéssiu dd’at organizau sa Biblioteca de Serrenti “Francesca Sanna Sulis”, in collabboratzioni cun su Comunu de Serrenti, cun sa libreria “La storia infinita” e cun sa truma de letura “Il sentiero dei libri” chi at a ligi unas cantu poesias intra de is prus cummoventis.
24/05/2024
Futei. Crésia de Santu Nartzisu.
In sa bidda de Futei si podint bisitai cresieddas de sartu, gratziosas, cun caraterísticas architetónicas chi ddas assétiant in unu tzircúitu istóricu-artísticu interessanti meda. Intra de custas, sa crésia de Santu Nartzisu, caraterizada de una fatzada fata de s’ aciunta de perdas vàrias. Est a sa manera romànica e parrit pesada prus o mancu a sa fini de su 1200. In sa parti arta si podit abbizai sa preséntzia de unu campanibi a vela, chi si pesat acanta de s’enna de s’ intrada. De forma asimmétrica, sa fatzada fiat decorada cun pratus in ceràmica polícroma e immui ndi est abarrau sceti s’ istampu tzirculari. Su Fàbbricu parrit unu pagheddu prus in artu arrespetu a su pranu innui si camminat e ddu ammostat s’ iscalera a semiluna. Passada s’ intrada, podeus assetiai chi is aposentus de aintru de sa crésia funt piticus, isceraus in duas navadas e sighius de pilotus in perda chi poderant is arcus a totu sestu abasciaus. Passendi po sa navada printzipali, si podit ammirai un’acuasantera piessigna in perda vulcànica iscrapeddada a fini, e s’ istàtua de Santu Nartzisu fata prus o mancu in su 1600. Prenu de piessignus funt is afestus chi faint in onori de su Santu: in s’ úrtimu fini de cida de Ladàmini , s’ istàtua de Santu Nartzisu est potada a coddu in sa cresiedda de Santu Nartzisu po s’ abetu de s’ arrosàriu, acuntèssiu innui trumas de óminis e féminas rasant, cantendi in fasis vicànicas, is pregadorias de su sacru rosàriu.
.jpg)
22/05/2024
Pabillonis. "Progetto Elisir"
Su Comunu de Pabillonis, in su cuntestu de is Serbítzius Sótziu-Educadoris distretualis de su PLUS de Gùspini, gestius de su Consórtziu Network cun sa Cooperativa Alfabeta, prommovint unus cantu Labboratórius Archeológicus rivólgius a sa genti manna, chi ddus faint is espertus de su Museu Archeológicu "Villa Abbas" una borta a sa cida a cumintzai de mércuris su 29 de Maju 2024 de is 5 e mesu a is 7 e mesu de a merí (17.30 - 19.30). In su interis de su labboratóriu s’ant a fai bessidas e un’ammosta-acontéssiu finali. Is iscritzionis funt a indonu e si pigant de mércuris su 22 de Maju de is 4 e mesu a is 7 e mesu de a merí (16.30 - 19.30) in su Tzentru de Agregatzioni Sotziali in Bia Su Rieddu n. 1 e abarrant abertas fintzas a sa lómpida de su númeru de partetzipantis.
21/05/2024
Mara Arbarei. Labboratóriu a indonu “Si spassiaus impari” po is pipius de sa 3 crassis de s'Iscola Elementari. 24 de Maju 2024
S'Ufítziu de Língua Sarda de su Comunu de Mara Arbarei organizat su labboratóriu "Si spassiaus impari" po is pipius e is pipias de sa 3 Elementari. Su labboratóriu si fait cenàbara 24 de Maju 2024, h. 16:00 – 17:30, in is aposentus de sa Biblioteca comunali, in V.li Rinascita 38, Mara Arbarei. Is iscritzionis s’arricint: - po messàgiu WhatsApp a su nùmeru 070 93069317 fintzas a is 11:30 de giòbia 23 maju; - po telèfunu a su 070 93069317 giòbia 9:30-11:30; - po e-mail a annaritapiredda23@gmail.com fintzas a is 11:30 de giòbia 23 maju; - in su sportellu lìngua sarda (localis de sa biblioteca) giòbia 23 de maju 2024 de is 9:30 a is 11:30. In is iscritzionis fatas po telèfunu o e-mail pedeus su prexeri de arremonai s’atòbiu de Cenàbara 24 de Maju e lassai nòmini e sangunau de su/a pipiu/a, de babbu/mamma/rapresentanti legali suu, indiritzu e nùmeru de telèfunu. Su labboratoriu est a indonu, ca est un'atividadi de s'isportellu linguisticu de mara Arbare chi fait parti de su Progetu Terras de Marmilla Linas e Campidanu, finantziau cun su dinai de sa Regione Autònoma de Sardigna cunforma a sa L.482/99 e a saL.R. 22/2028.
21/05/2024
Seddori. Labboratóriu de animatzioni a sa letura.
Su sistema bibbliotecàriu de sa Marmidda, ocannu puru, aparíciat in sa Bibblioteca de Seddori su Labboratóriu de Animatzioni po s’istadi po is pipius de s’ iscola primàrgia e po is piciocus de sa segundària de primu gradu. Ocannu ant a connosci su Micrumundu de is babballotis. Is iscritzionis funt giai abertas e si podint fai in bibblioteca.
17/05/2024
Pabillonis. Ammosta Bibliogràfica Documentali “Is bias, is Féminas e su strexu de terra”
Mammas, fillas e mulleris, coragiosas e tostorrudas, incherridas e siguras. Biaxànt a pei, iscrutzas, sighendi camminus sinnaus in is moris de sartu arestis e iscameddosus, cun córbulas càrrigas de pingiadas postas in conca, chentza de perdi sa figura inchérrida insoru, curendi sa béndida de su strexu de terra cun grandu dinnidadi e ingéniu. Custas funt is Fémminas chi s’ammosta bibliogràfica documentali de sa biblioteca de Pabillonis, intitulada “Is bias, is Féminas e su strexu de terra. Is pingiadas e il lavoro delle donne”, bolit arregodai cun un’arrica parada de testimonias, interbistas e biografias in ocasioni de Monumentus Abertus, chi in Pabillonis si fait Sàbudu 18 e Domínigu 19 Maju 2024. S’ammosta si podit abbisitai fintzas a s’8 de Làmpadas 2024 in is oràrius chi est aberta sa biblioteca.
17/05/2024
Futei. Sa bidda.
Noba pigada de su giassu internet www.discovermarmilla.it Futei, unu burgu agrículu de 1600 abbitantis, s’ isterrit óru óru sa sedda chi si agatat intra de su Médiu Campidanu e sa Marmidda. Custu logu est unu iscussòrgiu de testimònias istòricas, unu mosàicu ispantosu de monumentus chi imprassat su tempus preistòrcu e medievali. Intra de custus monumentus nci istupant is arrastus mannus de cincu nuraxis e su cumplessu de crèsias chi imprassant su trastu urbanu e su territòriu a inghìriu. Pagu atesu de su tzentru caraterísticu, nci est su Nuraxi, una bidda documentada giai de su XVII sèculu chi oi po sa majoria est ispopulau. Innoi, unu tempus, si istrantaxàt sa Crèsia Parrochiali antiga, sa crèsia de sartu de Santu Brai, chi apillat a su XIII sèculu. Unu ritu chi espressat sa paxi intra de Futei e Nuraxi, sorigada in su 1605 gràtzias a s’agiudu de su Baroni Santjust, campat fintzas a oi cumenti memòria simbòlica. Ònnia Domìnigu de is Pramas, su sìndigu donat a su vicàriu sa “prama de sa passioni” chi apustis potant in prutzessioni. Oindì sa parrochiali de Futei est dedicada a Santa Bràbara chi s’ afestat a s’incarreru de su Mesi de Idas. In custa crèsia funt arreguadas òperas de arti sacras istraordinàrias e artigianau de balori mannu. Aintru de custa, una pintura cummoventi chi afigurat s’ Iscravamentu de Gesucristu, chi si fait ònnia Cenàbara Santa, cumenti parti de is tzerimònias de sa Cida Santa. Parrochiali, ex parrochiali e cresieddas de Santa Maria de sa Natividadi, de Santu Nartzisu (chi apillat a su XIII sèculu), de Santu Bustianu e de sa Sacra Famìglia, s’ànimant trassintu de is festas. S’ incarrerat cun sa Passioni sa cenàbara a innantis de su Domìnigu de is Pramas, cun sa “pintadura de sa prama”, fintzas a su rituali de s’ Incontru de Pasca”, cun is prutzessionis dedicadas a sa Madonna Addolorada e a is Pramas, s’ apariciamentu de Cristu, e s’ Iscravamentu”. A Futei nci funt àtera festas religiosas cumenti su fogadoni de Santu Bustianu su 19 de Gennàrgiu, is tzelebratzionis de Santu Sidoru, patronu de is massàius, a mitadi de Maju, e sa Festa de Santu Brai a s’ acabbu de austu, cun sa prutzessioni de su santu chi torrat in bidda. Santu Nartzisu, s’ afestat a sa fini de su mesi de Ladàmini, s’arrosàriu est rasau in coru e s’ iscrammiant “is coggius” in sardu campidanesu. Sa festa manna si tzelebrat in sa segunda cida de Capudanni in onori de sa Natividadi de sa Vírgini. Apillant a su tempus de is Romanus is Termas antigas de is Bàngius, unu giassu chi tenit unu importu istóricu mannu, ispantosu, chi si est aciuntu a su caminu archeológicu de sa Marmidda. #discovermarmilla
16/05/2024
Sàrdara. Festa de Santa Mariàquas.
Noba pigada de sa pàgina Facebook de su Comitau de Santa Mariàquas 2024. Sa festa est ispartzida in tre diis, su 18, su 19 e su 20 de Maju 2024. Nci ant a essi afestus religiosus e tzivilis. Afestus religiosus Sàbudu su 18 de Maju 2024: - Oras 16:30 S. Rosàriu in sa Parróchia B. V. Assunta -Oras 17:00 Santa Missa in sa Parróchia B.V. Assunta -Oras 18:30 Prutzessioni cun s’ Istàtua de sa Madonna de sa Parróchia B.V. Assunta a su Santuàriu in Santa Mariàquas Domínigu su 19 de Maju 2024: -Oras 09:00 Santa Missa in sa Parróchia de Sant’ Antoni -Oras 10.30 Santa Missa in su Santuàriu -Oras 18:00 Santa Missa in su Santuàriu Lunis su 20 de Maju 2024: -Oras 16:30 S. Rosàriu in su Santuàriu -Oras 17:00 Santa Missa in su Santuàriu -Oras 18:00 Prutzessionipo sa furriada in bidda AfestusTzivilis Cenàbara su 17, Sàbudu 18 de Maju 2024 de isoras 15:00 a is oras 20:00 e Domínigu su 19 de Maju 2024 de is oras 09:00 a isoras 13:00 e de is oras 15:00 a is oras 20:00 is Volunteris de UNITRE ant acumpangiai is bisitadoris in su Bagnu Romanu, in sa Gruta e in is àterus Monumentus de su Cumpéndiu termali. Sàbudu su 18 de Maju 2024 -Oras 21:30 música de su grupu “4NO REASON” Domínigu su 19 de Maju – Sagra de sa brebei buddia cun su pràngiu “Sa Festa de is Pastoris” in sa localidadi de is Termas de Sàrdara . Si podit prenotai fintzas a su 17 de Maju in sa Carnitzeria “F.lli Altea”, in su “Market” Eola Corona, in sa Fruta e Birdura de Piano Giuseppe e in s’ Óticu Santona. -Oras 08:30: bessida in is Minieras de Sàrdara cun sa ghia e cun s’ atóbiu in is Termas. Is partitzipantis a sa bessida podint papai in is Termas po s’ocasioni de sa Sagra de brebei. -Oras 09:00: Pedalada Ecológica a incuru de is “Amatori Dinamo Sardara” (atóbiu in Pratza Libertadi po is iscritzionis”). Si partit de Sàrdara e s’arribat a is Termas. -Oras 12:30: pràngiu “Sa festa de is Pastoris”apariciau de su Comitau 1974 -Oras 16:00: “Amichevoli di Pallavolo” de varia categorias de edadi a incuru de sa “Pallavolo Sardara asd”. -Oras 17:00: dimustratzioni Taekwondo cun is pipius e a sighidura presentada de “Danza Moderna Contemporanea” a incuru de “Calipso Fitness” de Sàrdara. -Oras 18:00: presentada de su grupu “Fitness” a incuru de “Alessandro Scintu mo.da e Fitness” de Sàrdara. -Oras 19:00: presentada de su grupu musicali “The Reflex Sound” de Sàrdara. -Oras 20:00 presentada de “Dj Perro” de Sàrdara.
16/05/2024
Sàrdara. Pedalada ecológica.
Noba pigada de sa pàgina Fb de su Comitau Santa Mariàquas 2024. Programa: -Oras 09:00: atóbiu e iscritzionis in pratza Gramsci. -Oras 09:45: partentza de sa pratza. Is partitzipantis ant a fai unu ghíriu in is bias de su tzentru istóricu e a sighidura ant a andai in su sartu caraterizau de unu paesàgiu naturali ispantosu, intra de coloris e fragus de froris, passillendu a làcana de bellesas artisticas e archelógicas chi caraterizant Sàrdara. Su caminu est longu 12 km e durat prus o mancu 80 minutus. Custu caminu tenit una dificultadi médiu/bàscia. Totus is partitzipantis podint gosai de unu rinfriscu a s’acabu de sa pedalada e ant a fai fintzas unu sorteamentu a prémius po is partitzipantis. -A pustis de sa pedalada, su Comitau po s’ afesta de Santa Mariàquas aparíciat su pràngiu. Is iscritzionis si podint fai su Domínigu 19 in s’ àrea Termali o in is diis a innantis aintru de su 16 de Maju 2024 in sa Carnitzeria “F.lli Altea”, in su “Market” Eola Corona, in sa Fruta e Birdura de Piano Giuseppe e in s’ Óticu Santona, o tzerriendi is organizadoris a is númerus 3460890934 (Stefania) 3484714988 (Alessio).
14/05/2024
Seddori. Monumentos Abertos. Noba pigada de sa pàgina Facebook de su “Castello Medievale di Sanluri – Polo Museale Sanlurese”.
Domìnigu su 12 de Maju s’est isboddiada in Seddori sa de XXIV editzioni de Monumentos Abertos. Cumenti ònnia annu nd’ est aprobiada genti meda e intra de is monumentus de bisitai a indonu nci fiant: •Casteddu de Seddori In su 1355 su Rei Catalanu Perdu IV at fatu fabbricai su casteddueest s’ùnicu casteddu mediuevali abarrau ìndidu e innui si podit bivi. Trassintru de sa gherra intra de is Aragonesus e de Arborea, su casteddu fiat in su tzentru de is acuntèssius de sa gherra de sa segunda metadi de su XIV sèculu. Mancarisiat nomenau de “Lionora de Arborea”non nci funt documentus chi averìguint chi issa ddoi at bìviu. Su casteddu immoi est de propriedadi de is Contis Bidda Santa e aintru acasàgiat diferentis setzionis e colletzionis musealis. •Museu de su Pani e de su panitzai su Civraxu Su Museu de su Pani e de su panitzaisu Civraxu si agatat in sa domu Bidda Santa, chi in su tempus passauacasagiàt su mulinu, no atesu meda de su Comunu de Seddori. Su museu dd’ant incingiau in su 2017 cun sa punna de badrai e tramandai is costumàntzias antigas apitzus de su trabballu de su pani tìpicu de Seddori, su Civraxu, chi apillat a su 235 a.C. Su Museu est partziu in cincu setzionis chi contant s’istòria de su prodotu e de is traditzionis acapiadas a sa panitzadura. Is setzionis ammostant su trabballu de sa terra e is diferentis fasis de sa panitzadura ma donendi atentzioni a is traditzionis de su passau. •Museo Istòricu – Etnogràficu de is Capucinus Su Cunventu de is Capucinus de Seddori dd’ iant fundau in su 1609 gràtzias a s’ agiudu de su Marchesu de Làconi e de su Archibìscamu de Casteddu. Su Museu Istòricu – Etnogràficu de is Capucinus est a làcana de su Cunventu e est partziu in 3 partis: Museu trastus sacrus, Museu archeològicu e Museu Etnogràficu. De su 5 de Ladàmini de su 2022 fait parti de su Polu Museali de su Comunu de Seddori.
.jpg)
14/05/2024
Serrenti. Incingiadura de s’òpera de s’artista e tzeramista Alessandra Furcas
S’Amministratzioni Comunali de Serrenti, in collabboratzioni cun sa Biblioteca Comunali “Francesca Sanna Sulis”, su Sistema Bibliotecàriu Joyce Lussu e s’Assótziu Città della Terra Cruda “Progetu calidadi urbanística de Serrenti in s’arti”, cumbidat a totus a partetzipai a s’Incingiadura de s’òpera de s’artista e tzeramista Alessandra Furcas, cenàbara su 17 de Maju 2024 a is 5 e mesu de a merí (17.30) in su Polifuntzionali de bia Fara. Programma: -Saludus de su Síndigu Pantaleo Talloru e de s’Amministratzioni Comunali. Ant a chistionai Maura Boi (Visu-síndiga) e Antonella Pasci (Consillera Comunali) -Leturas a tema a incuru de sa truma de letura “Il Sentiero dei Libri” -Projetzioni de su cortometràgiu “Per dire no alla violenza sulle donne” Sighit s’Incingiadura de s’òpera in tzeràmica “Scarpette rosse. Contro la violenza sulle donne”. Móderat s’atóbiu sa bibliotecària Emanuela Porcu.
09/05/2024
Santu'Èngiu. Cunvénniu asuba de is tumoris ginecológicus “Conoscere per prevenire, dalla diagnosi alla terapia”. 11 de Maju 2024.
Noba pigada de su giassu: sangavinomonreale.net Sàbudu 11 de Maju, atóbiu in Santu 'Èngiu po unu merí dedicau a sa sensibbilizatzioni e a s'informatzioni asuba de sa preventzioni de is tumoris ginecológicus, cun atentu particulari a su tumori ovàricu, in ocasioni de sa Dí Mundiali dedicada a custa càusa importanti. Su cunvénniu intitulau “Tumori ginecológici. Conoscere per prevenire, dalla diagnosi alla terapia” si fait in sa sea de sa Pro Locu, sàbudu 11 de Maju, h. 17:30 gràtzias a s'organizatzioni de s'assótziu ativu meda “Insieme si può”. Reladoras de su cunvénniu, sa Dot.ra Manuela Neri, Dirigenti médicu de su Repartu de Ginecologia de su Territóriu in su Spidali “Businco” de Casteddu e sa Dot.ra Giulia Gramignano, Diretora de Oncologia de su Territóriu in su Spidali “Nostra Signora di Bonaria” de Santu 'Èngiu. Moderat sa dibbata Giusy Atzori, Presidenti de s'assótziu “Insieme si può”. Sa serada est de fundamentu po cumprendi s'importàntzia de sa preventzioni e de sa diagnosi lestra in sa lota contras a is tumoris ginecológicus, cun s'oportunidadi de aprofundiri sa connoscéntzia a suba de custus tumoris, de iscoberri is síntomus cabudraxus e de cumprendi cali analisi funt de profetu po una diagnosi lestra.
09/05/2024
Biddanoa de Forru. Aina de su mesi de Abrili: màriga de sa necrópoli de Prascocca
In su territóriu de Biddanoa de Forru, oru-oru cun su de Seddori, ddoi funt unu iaxi de necrópolis de edadi púnica e arromana, chi pertocant masonis chi trabballànt sa terra a lori e alegúmini. Medas bortas is tumbas ddas ant bogadas a foras is trabballus de aríngiu, innui ant agatau curredus chi andant de su de 3 sèculus i.C. a s’edadi imperiali. Intra de custas sa prus connota est cussa de Prascocca chi no est atesu meda de is sítius nuraxesus de Baccu Simeone e Santu Antiogu. In Prascocca, faendi un’iscavu iscientíficu de apretu asuba de tumbas a fossu covecadas de lastras e in zirus de trasportu, ant bogau a pillu unu corredu tzeràmicu de màrigas, marigheddas, un’unguentàriu, una lantiedda e unas cantu copas.
09/05/2024
Futei. “Is Bàngius”
Noba pigada de su giassu internet www.discovermarmilla.it In su comunu de Futei si podit bisitai su giassu archeològicu de is Termas Romanas Is Bàngius. S’iscoberta apillat a is annus 2000 mancari su giassu fiat de tempus osservau de is istòricus. Su nòmini Is Bàngius fait arreferimentu a sa funtzioni primàrgia de su giassu chi in italianu si bortat cumenti “Bagni termali”. Is iscavus ant portau a pillu unus cantu de arrastus de is Termas e de is Bàngius ma is istùdius non funt ancora acabbaus. Chi andat si agatat a castiai unu iscavu iscobertu e duncas sa possibbilidadi de ammirai sa particularidadi de unu trabballu chi iscarraxat iscussòrgius chi benint de unu tempus passau. Su giassu de Is Bàngius, po s’ importàntzia istòrica sua, fait parti de su caminu archeològicu de su territòriu de sa Marmidda. Su giassu si podit bisitai in calisisiat ora, est sèmpiri atzessibbili.
09/05/2024
Futei. “Agricoltori in festa”
Noba pigada de sa pàgina Facebook de sa Proloco Futei. S’ Assòtziu Turìsticu Proloco Futei cun su agiudu de sa amministratzioni comunali at cuncordau s’ atòbiu “Agricoltori in Festa”. Sàbudu su 18 de Maju a is oras 19:00 si fait sa Santa Missa in sa Parròchia de Santa Bràbara. Sighit sa Prutzessioni acumpangiada de is tratoris, su Grupu Folk Nuraxi de Futei, Cavalieris e Launeddistas. A is oras 20:30 aberrit sa Sagra gastronòmica in is campetus polivalentis cun su stentu musicali de su grupu “La Favola”.
08/05/2024
Santu 'Èngiu. Un'atóbiu po iscoberri su rolu de sa psicologia in oncologia. 8 de Maju 2024.
Noba pigada de su giassu: sangavinomonreale.net S'assótziu “Insieme si può” cumbidat a partitzipai a s'atóbiu cun sa Psicòloga Dot.ra Emanuela Giglio chi si fait mércuris 8 de Maju 2024 h. 17:00 in sa sea sotziali de bia Fermi in Santu 'Èngiu. Custa est un'oportunidadi de no perdi po cumprendi su rolu de sa psicologia no isceti in su cuntestu de is malaidus oncológicus, ma in su cuntestu de su benéssiri generali. Sa Dot.ra Giglio ghiat sa platea in una discussioni asuba de s'importu de su benéssiri psicofísicu po fai una vida serena e satisfada.
06/05/2024
Biddacidru. Sa Crésia de Sant'Antoni aberrit is gennas po “Monumenti Aperti”. 11 – 12 de Maju 2024
Noba pigada de su giassu: sangavinomonreale.net Is bisitadoris dd'ant apretzau meda, ocannu passau est istétiu su prus bisitau intra de is monumentus de Biddacidru. In s'editzioni de su 2024 de "Monumenti Aperti" sa Crésia de Sant'Antoni torrat a annoai sa partitzipatzioni sua e, gràtzias a circas de archíviu, iscoviat medas crosidadis e piessignus mai connotus de s'istória sua, prus longa e prus arrica de cantu non si cretat. Sa Crésia si podit bisitai sàbudu 11 e domínigu 12 de Maju, a mengianu h. 09:30 – 12:30 e a merí h. 16:00 – 20:00. In prus de s'abbisita a sa Crésia, si podit bisitai un'ammosta fotogràfica cun medas fotografias bécias e su museu parrochiali cun istàtuas, ogetus litúrgicus e paramentus chi non funt prus umperaus. In sa locandina totus is piessignus e unus cantu acuntéssius in prus diaderus interessantis.
06/05/2024
Su Comunu de Futei fait sciri a sa populatzioni chi a partiri de su 2 de Maju 2024 est ativu su servìtziu de s’ Ufìtziu de Lìngua Sarda chi fait parti de su Progetu “Terras de Marmilla, Linas e Campidanu”. Progetu finantziau cun su dinai de sa Regione Autònoma de sa Sardigna cunforma a sa L. 482/99 e a sa L.R. 22/2018 annualidadi 2023. S’ Ufitziu de Lìngua Sarda tenit sa punna de agiudai totus is tzitadinus e is tzitadinas, is assòtzius, is atividadis cumertzialis e calisisiat persona cun consulèntzias apitzus de sa Lìngua e de sa Cultura Sarda e fintzas labboratòrius. S’ Ufìtziu de Lìngua Sarda si agatat in sa Bibblioteca Comunali de Futei in bia Madre Teresa de Calcutta n. 1. A s’arriciri e a fai is atividadis nci at a essi sa dotora Giorgia Serpi ònnia Giòbia de is oras 10:00 a is oras 13:00. Su pùbblicu si arricit de is oras 10:00 a is oras 11:00.
05/05/2024
Biddacidru. Is Arréxinis de s'Identidadi Sarda intra de Gustus, Nuscus e Traditzionis. 11, 12 de Maju 2024
Sàbudu 11 e domínigu 12 de Maju 2024, s'Amministratzioni comunali de Biddacidru proponit unu calendàriu de acontéssius dedicau a is Traditzionis, sa Cultura e s'avaloramentu de is Primoris produtivus localis.
05/05/2024
Biddacidru. Ammosta e cunvénniu in onori de Salvator Angelo Spano 11, 12 de Maju 2024
In ocasioni de sa manifestatzioni "Monumenti Aperti 2024" in Biddacidru, su "Club di Jane Austen Sardegna" e s'assótziu "Salvator Angelo Spano" organizant in su Molinu Cadoni s'ammosta "Omaggio a Salvator Angelo Spano" e su cunvénniu "Salvator Angelo Spano: la vita, la fede, la politica, la cultura". S'atóbiu est sàbudu 11 e domínigu 12 de Maju 2024.
.jpg)
03/05/2024
Santu ‘Èngiu. Festa de Santu ‘Èngiu Màrtiri: su programma cumpletu. 3-5 de Maju 2024
Noba e fotografia pigada de sangavinomonreale.net Santu ‘Èngiu si preparat a afestai su Santu chi at donau su nómini a sa Bidda. De cenàbara 3 de Maju a domínigu 5 de Maju, difatis si annoat s’apuntamentu cun sa fidi e sa traditzioni de sa comunidadi santuingesa, cun is afestus in onóri de Santu ‘Èngiu Màrtiri. “ Si abetaus numerosus – custu su cumbidu de su “Comitato della Festa di San Gavino Martire” - cenàbara po bistiri su Santu e domínigu a sa prutzessioni. Cunfidaus in bosàterus po alluxentai is bias innui passat su santu”. Labai su programma cumpletu de is afestus religiosus e tzivilis.
.jpg)
03/05/2024
Mara Arbarei. Abetendi su de 4 atóbius cun “Primavera in Marmilla. 5 de Maju 2024
Noba e fotografias pigadas de sa pàgina “Facebook” de su Comunu de Mara Arbarei. Abetendi su de 4 atóbius cun “Primavera in Marmilla” iscoberreus Mara Arbarei, una biddixedda chi fait prus o mancu 3000 abbitantis chi domínigu 5 de Maju 2024 arritzis is bisitadoris cun “ Monumentus & Saboris: le rotte del grano – 2^ Sagra de sa Frégula”. Custa bidda ecisera si distinghit po is domus fatas in perda e làdiri, costituendi unu símbulu de su passau ispanniolu chi immui est ogetu de s’ammosta “Sulle vie del grano”. S’arti locali est poderosa cun is murales chi ant fatu disterraus cilenus e àteras espressionis artísticas chi ammostant sa diferéntzia culturali de Mara Arbarei. Su patrimóniu archeológicu de Mara Arbarei est aici etotu eciseri, cun unu campusantu púnicu a intru de su burgu, innui tumbas a càmera e a fossu, unas cantu decoradas cun pinturas muralis e motivus geométricus, funt istétias torradas a portai a luxi paris cun is corredis funeràrius insoru, chi in su benidori ant a èssiri espostas in su Museu Archeológicu ( Ammassu de su trigu béciu), unu fàbbricu istóricu chi in orígini fiat destinau a s’imprestidu de su trigu. Unu de is tretus prus eciseris de Mara Arbarei est su giru de is crésias, logus de veneratzioni chi custodiant iscusorxus de s’arti cristiana. Custas crésias contant istórias de divotzioni profunda chi at auniu sa comunidadi de Mara Arbarei in is séculus. Intra de custas, luxint sa Crésia de Santu Perdu e sa Crésia parrochiali de Santu Giuanni Batista. Domínigu 5 de Maju si abetaus in Mara Arbarei, burgu prenu de mistériu chi arritzit totus is chini disígiant isprorai is logus eciseris de sa bidda. ©Fotografias e informatzionis pigadas de “Discover Marmilla”, progetu nàsciu po prummovi in manera unitària sa Marmilla cumenti a destinatzioni turística.
02/05/2024
Biddanoa de Forru. Festa de Beranu. Una dia in mesu a sa natura.
Po donai su beni beniu a su Beranu sa Proloco Biddanoa de Forru si cumbidat domínigu su 12 de Maju 2024 a passai impari una dia passillendi in su sartu de Biddanoa de Forru. Programma: - h. 10:15 Apuntamentu in Pratza Costituzione - h. 10:30 Si partit po sa passillada - h. 13:00 Pràngiu in sa localidadi “Acqua Frida” Po informatzionis e prenotatzionis 3331760216 - 334 9229138 Si cunsillat de si bistiri e de si cratzai còmudus, de si ingolli àcua de bufai e unu capeddu. Sa passillada est longa unus 6 chilòmetrus e est bastanti fàtzili. Po su pràngiu is assotziaus e is residentis in Biddanoa de Forru pagant 13 éurus sa genti manna e is pipius (6-10 annus) pagant 6 éurus. Is prenotatzionis po su pràngiu s’arricint aintru de s’8 de Maju.
02/05/2024
Biddanoa de Forru. Atividadis istadialis po piciocheddus e piciocheddas
Si fait isciri chi in s'Albu Pretóriu in-línia, reg. num. 401, est pubblicau s’avisu e sa modulística po partitzipai a is atividadis istadialis po minoreddus (residentis e non residentis). Is destinatàrius funt is minoreddus (residentis e non residentis) chi ant abbitau de sa classi 3 de s’Iscola Segundària de Primu Gradu in s’a.s. 2023-24, e fintzas a is 17 annus de edadi. Su servítziu est un’istentu de 5 dís e 4 notis in unu Camping Village. -1^ turnu: de su 2 a su 6 de Meseargiolas; -2^ turnu: de su 9 a su 13 de Meseargiolas. Sa domanda de iscritzioni impari a sa documentatzioni pedia si podit presentai fintzas a su 7 de Maju. Acàpiu a s’avisu in s'Albu Pretóriu https://sol.comune.villanovaforru.su.it/villanovaforru/mc/mc_p_dettaglio.php?id_pubbl=19206id_pubbl=19206
02/05/2024
Biddanoa de Forru. “Piscina day”
Si fait isciri chi in s’Albu Pretóriu in-línia, reg. num. 399, est pubblicau s’avisu e sa modulística chi pertocant s’alentadura in piscina po minoreddus (po residentis e non residentis). Is destinatàrius funt TOTUS is minoreddus chi ant abbitau de sa Classi Prima de s’Iscola Primària a sa de Tres classis de s’Iscola Segundària de Primu Gradu, in s’annu iscolàsticu 2023/2024. Ant a essi asseguraus n. 8 mengianus a incuru de s’istrutura atretzada de Bobadri po n. 4 oras a sa dí de is 9 oras a sa una (9.00 - 13.00) + duas giorronnadas in su Parcu Acuàticu e/o Parcu Aventura. Sa domanda de iscritzioni impari a sa documentatzioni pedia si podit presentai fintzas a su 7 de Maju 2024. Acàpiu a s’avisu in s'Albu Pretóriu https://sol.comune.villanovaforru.su.it/villanovaforru/mc/mc_p_dettaglio.php?id_pubbl=19206
28/04/2024
Santu 'Èngiu. Incinciadura de su Museu de su fúbbalu sardu “Nuccio Delunas”.
Noba pigada de su giassu: www.sangavinomonreale.net Su 3 de Maju 2024, h. 18:00, in bia Convento, in su campu isportivu "Santa Lucia", in Santu 'Èngiu, ddoi est s'incingiadura de su Museu de su fúbbalu sardu intitulau a Nuccio Delunas. In s'acontéssiu funt presentis: s'Amministratzioni Comunali Corrado Delunas Giovanni Zucca, Claudia Pinna Alessandro Spano. Su Museu si podit bisitai puru su 4 e du 5 de Maju in ocasioni de "Monumenti Aperti".
28/04/2024
Biddacidru. “Un libro al giorno”. Sa proposta noba de su Sistema Bibbliotecàriu Monti Linas.
In ocasioni de su “Maggio dei Libri”, campàngia natzionali de prumotzioni a sa letura nàscia in su 2011 cun sa punna de ponni in luxi su valori sotziali de is libbrus, Su Sistema Bibbliotecàriu Monti Linas, si proponit, a de su I de Maju fintzas a su 31 de Maju 2024, “Un libro al giorno” cuntzillus de letura fitianus chi si podint donai bideas po is leturas cosa de bosàterus.
27/04/2024
Sàrdara. Su Cursu de Língua Sarda de I livellu non si fait prus po mancàntzia de iscritzionis.
Su Comunu Sàrdara, alleau de su Comunu de Seddori in su progetu “Terras de Marmilla, Linas e Campidanu”, finantziau cun su dinai de sa Regione Autònoma de Sardigna cunformas a sa L.482/99 e a sa L.R. 22/2018, fait isciri a is tzitadinus e a is tzitadinas chi, a dolumannu, non si fait prus su Cursu de Língua Sarda de 1° livellu, ca non si est sodigau su númeru mínimu de iscritzionis chi sa Regione Autònoma de Sardigna pedit po fai inghitzai is cursus.
27/04/2024
Samassi. Su Cursu de Língua Sarda de I livellu non si fait prus po mancàntzia de iscritzionis.
Su Comunu de Samassi, alleau de su Comunu de Seddori in su progetu “Terras de Marmilla, Linas e Campidanu”, finantziau cun su dinai de sa Regione Autònoma de Sardigna cunformas a sa L.482/99 e a sa L.R. 22/2018, fait isciri a is tzitadinus e a is tzitadinas chi, a dolumannu, non si fait prus su Cursu de Língua Sarda de 1° livellu, ca non si est sodigau su númeru mínimu de iscritzionis chi sa Regione Autònoma de Sardigna pedit po fai inghitzai is cursus.
Tzitadi de Seddori
Cuntatus
Tzitadi de Seddori
Bia Carlo Felice 201, 09025
Seddori (SU)
Códixi fiscali / P. IVA:
82002670923
Tzentralinu: +39 070 93831
Cuntatus
Àrea Isport Cultura e Turismu
Dot.ra Alessia Etzi
070/9383252