25/07/2024
Biddanoa de Forru. “Giornalando in Biblioteca”
Ocannu puru sa Biblioteca Comunali de Biddanoa de Forru at arregortu totu su materiali netzessàriu e duncas tenit su prexeri de cumbidai totus is amantiosus de sa comunicatzioni a sa redatzioni de sa de 7 editzionis de “Il Giornalino”. Is nobas arregortas s’ant a ponni impari e imprentai po essi allogadas in sa Biblioteca. Chi ddoi at genti chi bolit partetzipai podit andai a Biblioteca cenàbara 26 e mércuris 31 de Meseargiolas de is 9 oras e mesu a is 11 e mesu (9.30-11.30). Po pediri informatzionis tzerriai a su númeru 0709331012.
25/07/2024
Biddanoa de Forru. Festa de su Disterrau 2024
S’Assótziu Proloco de Biddanoa de Forru cun s’amparu de su Comunu de Biddanoa de Forru, organizat sa de 25 Festas de su Disterrau mércuris 14 Austu 2024. Sa Festa de su Disterrau est dedicada a totu cussa genti chi si nd’est andada de Biddanoa de Forru in totus custus annus e chi però est avesa a ndi torrai po is vacàntzias istadialis, po saludai is parentis e is amigus chi funt abarraus in bidda, ma est fintzas unu momentu po abarrai impari. S’acontéssiu si fait in Pratza Costituzione cun una cena informali acumpangiada de sa música de su grupu “Nuvolari Canta” de is h. 22.00. Po sa cena sa genti manna pagat 25 èurus e is pipius 15 èurus. Po informatzionis e prenotatzionis: Vilma 333 1760216 - Efisio 334 922 9138
25/07/2024
Biddanoa de Forru. Festa de Santa Marina 17.07.2024
Biddanoa de Forru est s’única bidda in Sardigna chi tenit una crésia dedicada a custa Santa, Vírgini e Màrtiri. Segundu sa traditzioni sa Santa est originària de sa Galítzia, in Spagna. A Santa Marina dd’afestant duas bortas a s’annu: su 17 de Meseargiolas in arregodu de su martíriu suu e su martis pustis de Pasca Manna. Sa crésia in su sartu de Santa Marina est acanta meda de sa bidda, dd’agataus in su ladu deretu de sa bia chi portat a sa Statali 131 e est posta in logu panoràmicu, faci a sa bidda. Est un’edifítziu antigu meda e cumenti testimòngiat unu rétulu scurpiu in su 1686, chi sa cópia est murada a parti de foras a su costau de s’intrada printzipali, est de su 1280. Po ndi isciri de prus: https://visitvillanovaforru.weebly.com/santa-marina.html
25/07/2024
Biddanoa de Forru. Aina de Meseargiolas: Màriga bizantina de su Nuraxi Genna Maria
Sa vida in su nuraxi sighit, fintzas pustis de séculus meda chi is romanus non nci fiant prus. Sa proa est una màriga chi cunteniat binu o ollu de s’època bizantina (VII-VIII sec. p.C.) chi ant agatau aintrus de su nuraxi. Cumenti est documentau in àterus nuraxis puru, podit essi chi is bizantinus tenessint presídius militaris in custus monumentus a càstiu de su territóriu.
25/07/2024
Mara Arbarei. Ambulatòriu straordinàriu ASAP
Sa ASL Campidanu de Mesu fait sciri ca de giòbia 18 de argiolas 2024 est abertu s’Ambulatòriu Straordinàriu ASAP chi assigurat s’achistèntzia primària a is tzitadinus abarraus chentza de mèdicu de famìllia. Su serbìtziu at a essi ativu ònnia giòbia de is 15:00 a is 19:00 in su Poliambulatòriu de Seddori in bia Bologna n. 13.
25/07/2024
Santu 'Èngiu. Sa "Associazione SKIZZO" fait dexi annus: un'arregorta de dinai po finantziai unu Festival artísticu.
Noba pigada de su giassu: www.sangavinomonreale.net Ocannu, a s'acabbu de Austu, sa "Associazione SKIZZO", paris cun su progetu "Non solo Murales di San Gavino Monreale", fait 10 annus. In cantieri ddoi at unu grandu ispantu po is tzitadinus e po is medas sustenidoris chi sighint cun prexeri e ammiratzioni is impresas de custu progetu importanti, po torrai a cualificai in manera artística logus mancai unu pagu isbandonaus. "De annus teneus in sa conca nosta una bidea – ispricant is assotziaus – unu grandu disígiu, su de fai unu Festival mancai piticu chi durat unas cantu dís, istrangendi artistas importantis in su panorama mundiali de sa "Steet Art". Po custu, in sa piataforma "GoFundMe" est istétia organizada un'arregorta de dinai po finantziai sa bidea chi, po calincuna dí, iat fai bessiri Santu 'Èngiu sa capitali internatzionali de sa "Street Art". "Totu su dinai chi eus a arregolli – si ligit in su manifestu "GoFunMe" – ddeus a umperai isceti po comporai vernitzi e ndi bogai is ispesas chi nci ant a éssiri po custu grandu progetu". Sa "Associazione SKIZZO" est un'assótziu "No Profit" nàsciu cun sa tarea de prummovi e ispartzinai sa "Street Art" e su muralismu che a arma contras a s'iscurióri de is biddas. Is voluntàrius òperant prus che totu in Santu 'Èngiu ma de su cuartiéri generali in bia Santa Croce trentzint in totu su territóriu sardu e natzionali. In 10 annus – ispricant is assotziaus a sa "Associazione SKIZZO" – eus fatu, paris cun medas artistas internatzionalis, prus de 70 òperas d'arti "en plein air" agiudendi, cun su colori, a torrai a cualificai e avalorai meda logus isbandonaus e chentza decoru. Torraus gràtzias a totus po s'agiudu mannu".
25/07/2024
Santu 'Èngiu. “Estate Sangavinese” cincu film de importu po “Cinema all'Aperto” de sa Pro Loco.
Noba pigada de su giassu: www.sangavino monreale.net Sa Pro Loco de Santu 'Èngiu fait isciri chi si torrat a fai su “Cinema all'Aperto”, una série de acontéssius istadialis chi impromitint seradas de intratenimentu a suta de is isteddus. Ocannu, sa programmatzioni ofrit un'isceberu de film importantis , fadendi bessiri is notis istadialis ancoras prus màgicas e interessantis po totus is amantiosus de tzínema. Sa proposta, chi arritzit grandu acunsentimentu intra de is residentis e is turistas in abbisita in Santu 'Èngiu, est de unu totu a indonu, e cunfirmat s'impénniu de sa Pro Loco e de s'Amministratzioni Comunali a prummovi sa cultura e s'ispàssiu in sa Comunidadi. Labai su programma: 25 de Argiolas, “Aquaman e il regno perduto” 1 de Austu, The Creator 29 de Austu, “Oppenheimer” 12 de Cabudanni, “One life” 19 de Cabudanni, “Take shelter”. Totus is projetzionis si faint in Domu Mereu, bia Diaz, Santu 'Èngiu.
25/07/2024
Santu 'Èngiu. Mancant pagus dís a “Trattorando” sàbudu 27 e domínigu 28 de Argiolas 2024.
Noba pigada de su giassu: www.sangavinomonreale.net S'acontéssiu santuingesu chi in su 2024 fait is primus dexi annus at apariciau, po is amantiosus, novidadis e medas cunfirmas agradéssias. Parteus de domínigu, su mengianu difatis est su turnu de is prus piticus cun su “Batiari de su Tratori”. Totus is pipius, fintzas a is otu annus, chi si bolint misurai sa primu borta cun unu tratori ddu podint fai e, acabbada s'aventura, ddis donant s'atestau de “Trattorando”. Sémpiri su domínigu a mengianu, is mannus podint fai su “Cursu patentinu tratori”. Domínigu a merí intamis ddoi est sa “Festa de su Bitellu” e a s'acabbu de sa festa ddoi est su cuntzertu de Maria Luisa Congiu. Sa primu dí de “Trattorando” perou est sàbudu, h. 10:00 de a mengianu ddoi est s'incingiadura cun s'abertura de is “stand”, intamis su merí est su momentu de is garas e de is provas de abbilidadi: sa gara de tràinu, ispundidura de sa ballixedda, percursu abbilidadi e pedana basculanti. A s'acabbu de sa serada ddoi est sa novidadi de su 2024 chi in medas abetant: su “Sexy Tractor Wash”.
25/07/2024
Biddacidru. “Aspettando San Sisinnio”. 30 de Argiolas 1 de Austu 2024.
S'Assessorau a sa Cultura, Ispetàculu e Língua Sarda de su Comunu de Biddacidru in collabboratzioni cun su GAL Campidanu e su Parcu Geomineràriu Istóricu e Ambientali de sa Sardigna presentant: “Aspettando San Sisinnio” -30 de Argiolas 2024 h. 20:00 – Pratza Zampillo, Presentada de su líbburu “Sisinnio di Leni. L'uomo chiamato Cigno” de Efisio Cadoni 31 de Argiolas 2024, h. 20:00 – Pratza Zampillo, Presentada cun narratzioni musicali de su líbburu “Cogas” ed. Associazione Culturale Artecetra. 1 de Austu 2024, h. 21:30 – Pratza Madonna del Rosario, Serada de Baddus Sardus in pratza cun “Sonos in Cumpanzia” a incuru de is Grupus Folclorísticus “Gippi Villacidro” e “Città di Villacidro”. S'immàgini in sa locandindina dd'at cuntzédia a indonu s'autori Ferdinando Piras Campesi a su Comunu de Biddacidru in data 3 de Austu 2023.
24/07/2024
Sàrdara. Ammosta fotogràfica “Frammenti di paesaggio della Marmilla”.
Cenàbara su 26 de Argiolas a is oras 18:30 in sa “Casa Pilloni” in vico Eleonora d’ Arborea 10 nc’ est un’ ammosta fotogràfica “Frammenti di paesaggio della Marmilla” de s’ artista Bruno Massimo Medda. Po s’ acuntéssiu nc’ ant a essi su Presidenti de sa Cooperativa Villa Abbas Andrea Caddeo, su Diretori de su Museu archeológicu Villa Abbas Giorgio Murru, su Síndigu de Sàrdara Giorgio Zucca, s’ Assessori a is Benis Culturalis Roberto Caddeo, s’ Assessori a sa Cultura e a su Turismu Antonio Mameli, sa Curadora de s’ ammosta Elena Mameli e s’ Artista Bruno Massimo Medda.
22/07/2024
Biddacidru. Acabbaus is trabballus de sa Lolla de sa Crésia de Santu Sisinni
S'Amministratzioni Comunali de Biddacidru tenit su prexu de fai isciri a is tzitadinas e tzitadinus chi is trabballus in sa lolla e s'imbrachinadura a parti de foras de sa Crésia de Santu Sisinni funt acabbaus in antis de su tempus prevídiu! Narat "Eus torrau a donai su decoru chi meresciat a unu de is monumentus identitàrius de Biddacidru, unu logu chi totus is cirdesus tenint in su coru, chi si agatat in unu cuntestu ambientali eciseri e de grandu valori. Custu interventu, finantziau de sa Regioni Autònoma de Sardigna e cumpriu gràtzias puru a s'istrutura técnicu-amministrativa, est po nosu motivu de grandu satisfatzioni e rapresentat un'àteru obbietivu sodigau chi ammosta s'impénniu nostu in s'avaloramentu e in sa cura de su patrimóniu istóricu-culturali" #chiesasansisinnio #valorizzazionebeniidentitari #comunedivillacidro #RestauroChiesaSanSisinnio #insiemesipuó
20/07/2024
Mara Arbarei. Spetàculu de dantza sportiva – Tzentru stùdiu dantzas Mara Arbarei
Sa scola de ballu “CENTRO STUDIO DANZE” de Mara Arbarei tenit su prexeri de arriciri totu sa popolatzioni a su spetàculu de sàbudu 20 de argiolas 2024 in Pratza de Corti a ora de is 22:00.
18/07/2024
Santu 'Èngiu. Cras 19 de argiolas sa de suas dís de su “Festival Letterario del Monreale” cun Jeff Biggers, Nicoletta Verna e Luca Briasco.
Noba pigada de su giassu:www.sangavinomonreale.net Cras, cenàbara 19 de argiolas, sa de duas dís de su “Festival Letterario del Monreale” ( Festival Literàriu de su Murriali) cun s'atóbiu “Occasioni di rinascita: didattica e lettura in carcere”, Jeff Biggers, su Coru “Paulicu Mossa” de Bonolva, Nicoletta Verna, Luca Briasco e Andrea Fulgheri. Cras, a cumentzai de is seti de a merí (h. 19:00), sa de duas dís de su “Festival del Monreale” in Domu Mereu. - h. 19:00 si cumentzat cun s'atóbiu “Occasioni di rinascita: didattica e lettura in carcere” cun is interventus de Cristina Cabras, Professora assotziada de Psicologia Sotziali in s'Universidadi de Casteddu; Cristina Ornano, Presidentissa de su Tribbunali de Sorvelliàntzia in su tribbunali de Casteddu; Matteo Pinna, Presidenti de s'Órdini de is abogaus de Casteddu; Manuela Saba, Agenti penitentziària; Fabio Varone, Cumponenti de sa Càmera Penali de Nùgoro, Angelo Mazza, Iscritori e insennianti de iscritura in su presoni de Badu 'e Carros. Mòderat Giorgio Pia. - h. 19:45 ( otu mancu cuartu de a merí), presentada – ispetàculu: Jeff Biggers fueddat de su líbburu suu “In Sardinia: an unexpected journey in Italy” (Melville House Publishing) cun Rossella Perra. Partitzipat su Coru “Paulicu Mossa” de Bonolva. - 20:45 (noioras mancu cuartu de a noti), tocat a Nicoletta Verna chi presentat su líbburu suu “I giorni di vetro” (Einaudi). A s'autora dd'afiancat Francesca Spanu. S'úrtimu atóbiu de sa dí, h. 22:00 (dexi de a noti) est riservau a sa rexonada intra de Luca Briasco e Andrea Fulgheri a suba de su tema “I sognatori: Stephen King, Paul Auster, Cormac McCarty”.
18/07/2024
Santu 'Èngiu. Cun sa paristória “Su trustullu de Perda 'e frau” torrant a cumentzai is atividadis de s'Assótziu SKIZZO. 23-27 de Argiolas 2024.
Noba pigada de su giassu:www.sangavinomonreale.net Torrant a cumentzai is atividadis de s'Assótziu SKIZZO cun acontéssius artísticus nous po sighiri su progetu de “Non solo Murales di San Gavino Monreale”, is vista de is grandus afestus po is dexi annus de s'assótziu culturali santuingesu. Su primu interventu de su 2024 ddu fait Giacomo Putzu, artista de Santu 'Èngiu cun unu omenàgiu a sa paristória de “Su trustullu de Perda 'e frau”. Perda 'e frau (pietra del fabbro) est su nómini de una zona de sartu de Santu 'Èngiu, innui passàt sa bia bécia po lompi in sa bidda de Gonnos. Sa paristória narat chi una dí, unu messaju chi, a cuaddu e carru furriàt a bidda, passendi a cussas parti, iat biu unu pipius in s'oru de s'istrada chi prangiat disisperau. “ Poita prangis, o su pipiu?” dd'iat pregontau s'ômini e su pipius dd'iat respustu “Mi seu pérdiu. Mi iat podi torrai a portai a domu, po prexeri?”. “Andat beni” iat respustu s'ómini, “Setzi in su carru, ti nci torru a acumpangiai deu”. Is duus fiant partius, ma luegus s'ómini si ndi acatat chi su carru e su cuaddu non nci dda fadiant a avantzai, tanti chi a sa fini si fiant firmaus. A nudda fiat serbiu a ddu iscudi a zirónnia: su cuaddu firmu fiat e firmu fiat abarrau. A custu puntu s'ómini si fiat furriau faci a su pipiu e iat biu chi is cambas suas, mudadas in peis de crabu, fiant ancoradas in in terra. Ispantau e atzicau, s'ómini iat ghetau unu tzérriu e iat pregontau a su pipiu “ E tui chini ses?”. Custu si fiat postu a arriri a iscracàlius, e si fiat isparéssiu in una pampada. Fiat su Tiàulu. S'atóbiu dedicau a s'Arti e a custa paristória de sa traditzioni santuingesa est in bia Marianna Garau a su númunu tzívicu 55, de su 23 a su 27 de Argiolas 2024. Is voluntàrius si abetant po unu saludu e arritziri s'agiudu de sa populatzioni.
18/07/2024
Seddori. Noba pigada de s’ Unione Sarda.
Forrus púbblicus po coi su pani típicu de Seddori, su Civraxu. Torrant a partiri is trabballus cun su valori de 150 milla èurus, dinai chi ant donau po arrangiai s’ àrea a làcana de su Museu de su pani. Is magasinus stòricus de s’óllu de su mulinu antigu ant a essi recuperaus e mudaus in forrus comunitàrius a linna po sforrai su civraxu e is drucis típicus, ma fintzas po una fiera pitica e unu centru de formatzioni. Unu logu innui coniugai traditzioni, cultura, socialidadi, decoru e seguresa, cumpromítiu de is immóbilis abbandonaus de prus de unu séculu. Po mori de una varianti de su progetu, po s’ arriscu de s’arruta de is murus, is trabballus funt lentus. Ant essi fatus in perda , chentza de mudai su stili bécciu. “Su progetu – arregodat s’assessori comunali a su Patrimóniu, Paolo Usai – tenit sa punna de fai logus de imperai, cun interventus miraus a s’ impreu de s’ àrea cun scopus culturalis e socialis. Seus circhendi de essi lestrus cun totus is progetus po torrai a donai in pressi a is citadinus àreas abbandonadas chi torrint a fai bella sa citadi.”
18/07/2024
Seddori. Statzioni noba po su Sucursu Alpinu.
Cenàbara su 19 de Argiolas a is oras 18 inaugurant sa sea noba de sa Statzioni de su Médiu Campidanu de su Sucursu Alpinu e Speleológicu de sa Sardigna. Po s’ocasioni sa sea at a essi aberta a totus is visitatoris chi ant a bòlliri connosci is ainas po s’ agiudu, is socorridoris e is contus apitzus de is interventus. Sa strutura, chi su Comunu at postu a dispositzioni est in bia Cesare Pavese e at a ospitai totus is ainas tènnicas e sanitàrias chi tenit su personali de su Sucursu Alpinu po pódiri fai is interventus in logus innui non si pòdiri atobiai e in is montis e sa màchina po su sucursu. Sa Statzioni de su Médiu Campidanu, chi a innantis fiat in Santu ‘Engiu, dd’ant traslada in su Comunu de Seddori po permiti a is màchinas e a is sucurridoris is atividadis de presídiu prus lestras. Narat su síndigu Alberto Urpi: “Seus cuntentus meda, su Comunu de Seddori óspitat un’ àteru servítziu subracomunali e a disposta po sa província intrea. Funt entis chi arribbant a pustis de chistionadas longas e impignu mannu de parti de s’amministratzioni. Su tenni in Seddori sa sea de su Sucursu Alpinu specializau in su sarvamentu, recúperu e circa de chini si pèrdiri est motivu de mannosia.” Is fueddus de su Presidenti Regionali Guido Biavati: “Po s’ocasioni de custu importanti cambiamentu po sa nostra Statzioni de su Médiu Campidanu, bollu espressai duus ringratziamentus: a su Comunu de Santu ‘Engiu, po ai postu a disposta fintzas a oi sa strutura sua, a su Comunu de Seddori po s’agiudai in custa fasi noba cun una sea assetiada in una positzioni beni sestada po su presídiu de su territóriu.” De 70 annus su Corpu Natzionali Sucursu Alpinu e Speleològicu fait sucursus – sanitàrius e non – in logus de monti, in grutas e in àteru logus innui non si pòdiri atobiai de su territòriu natzionali cun 7000 operadoris specializaus. In Sardigna nci funt 250 ténnicus chi assegurant s’agiudu 24 oras a sa dii, po 365 diis a s’annu in totu su territòriu regionali, innui nci funt 6 Statzionis Alpinas e 4 Statzionis Speleològicas.
18/07/2024
Santu 'Èngiu. In su “Festival Letterario del Monreale” cras Daria Bignardi, Nicola Dessì, Adriano Corona e Beniamino Zuncheddu.
Noba pigada de su giassu: www.ilsardingtonpost.it Cras 18 de Argiolas 2024, sa primu dí de sa de 6 Editzionis de su “ Festival Letterario del Monreale” (Festival Literàriu de su Murriali) cun Daria Bignardi, Nicola Dessì, Adriano Corona e s'atóbiu dedicau a su líbburu “Io sono innocente” (De Agostini) de Mauro Trogu e Beniamino Zuncheddu. S'abertura ufitziali de s'editzioni 2024 de su “Festival Letterario del Monreale” (Festival de su Murriali) cras, 18 de Argiolas 2024, h. 19:00 in Domu Mereu cun sa presentada de su sàgiu “La Sardegna in Età Punica (Condaghes), innui s’archeólogu Nicola Dessì, torrat a percurri sa preséntzia de is Púnicus in Sardigna, chi iant fundau tzitadis che a Karaly, Sulky, Tharros, Nora, Bithia e medas àteras. Fueddant cun s’autori Francesca e Carlotta Spanu. - h. 19:45 (otu mancu cuartue a merí), Adriano Corona presentat su romanzu “Stiamo vicini che qui non si tocca” (Amicolibro) – un’istória de amigàntzias, raportus intra de fillus e babbus e mammas e de un’amori nueddu, chi bolit isceti sa possibbilidadi de si cumpriri – ndi fueddat cun Carmen Salis e Leonardo Uda. - h. 20:45 (noioras mancu cuartu de a noti), Daria Bignardi presentat su líbburu cosa sua “ Ogni prigione è un’isola” (Mondadori), in custu líbburu s’autora contat su biaxi suu in s’isulamentu e in is presonis, interioris puru, partendi de issa, ponendu·si in giogu, diaici cumenti at fatu su mengianu de su 9 de Martzu 2020 in unu vídeu girau in antis de su presoni de San Vittore, in s’interis chi unus cantu cartzeraus artziant a crabetura aunendi·sí a is rebbellias chi fiant esplodendi in medas presonis italianas. In fatu a cussus acontéssius fiant mortas 13 personas cartzeradas. Daria Bignardi ndi fueddat cun Giovanni Follesa e Francesca Spanu. - h. 22:30 (dexi e mesu de a noti), logu a s’atóbiu dedicau a su líbburu “Io sono innocente” (De Agostini) de Mauro Trogu e Beniamino Zuncheddu, su contu a duas boxis de una de faddinas giudiziàrias prus gravis de sa giustítzia in Itàlia. Un’istória de siléntzius e tempus firmu, e in su matessi momentu de circa e de lota chena de pàsiu. In prus de is autoris intervenint Irene Testa (Garanti Regionali de is cartzeraus) e is abogadas Rossana Palmas e Francesca Spanu. Mòderat Andrea Pau. ORGANIZATZIONI S’acontéssiu dd’at organizau su Comunu de Santu ‘Èngiu in collabboratzioni cun s’assótziu “Festival Letterario del Monreale”, su Sistema Bibbliotecàriu Monti Linas, cun s’agiudu de sa Regione Autònoma de Sardigna, de s’Assessorau de s’Istrutzioni Púbblica, Benis Culturalis, Informatzioni, Ispetàculu e Isport e de sa “Fondazione di Sardegna” cun su cordinamentu organizativu de sa “Associazione Enti Locali per le Attività Culturali e di Spettacolo”. Po totu sa durada de su Festival est presenti sa libbreria “Edumondo” de Casteddu cun sa postatzioni de béndita de líbburus.
16/07/2024
Seddori. Spetàculu de Dantza.
Su 27 de Argiolas 2024 a is oras 21:45 in su Parcu Comunali s’Arei, cun su patrocíniu de su Comunu de Seddori, est in programma unu spetàculu de dantza cuncordau de “Associazione Sportiva Dilettantistica Adrenalina dance school”. Ant a baddai is maistus de dantza Arianna e Ignazio Mura. S’ intrada est líbbera.
16/07/2024
Seddori. “Gran Galà del Calcio Sardo”.
Su 15 de Argiolas a is oras 18:30 su Teatru Comunali Akinu Congia at ospitau su “Gran Galà del Calcio Sardo” cun sa cerimónia de premiatzioni de is sotziedadis bincentis is Campionaus Regionalis, is Cupas Disciplinas, su “Progetto Valorizzazione Giovani Calciatori” de sa stagioni sportiva 2023/2024. Fiant convocadas totus is sotziedadis de premiai ma fintzas totus cussas chi ant partitzipau a is atividadis federalis de sa stagioni acabbada de pagu. A sa premiazioni nci fiant i prus artus Dirigentis Sportivus Federalis Regionalis
15/07/2024
Santu 'Èngiu. “Biblioteca Inclusiva”, inghitzat unu progetu nou.
Noba pigada de “La Gazzetta del Medio Campidano” Est inghitzau su progetu “Biblioteca Inclusiva” in totus is bibliotecas de su Sistema Bibliotecàriu Monti Linas. Sa “Cooperativa Agorà Sardegna” chi gestiscit is bibliotecas de Gùspini, Santu 'Èngiu, Biddacidru, Gonnos, Arbus Pabillonis e Sàrdara at prummóviu custa initziativa importanti in su campu de s'inclusividadi. In custas bibliotecas, difatis, funt disponíbbilis materialis e servítzius adatus a is abbisóngius de chini tenit dificultadi a atzedi a sa letura po nexi de una disabbilidadi tempurànea o permanenti, chi podit èssiri de tipu físicu mentali o psicológicu. Funt disponíbbilis líbburus chi si podint ligi cun fatzilidadi, cun caràtiris mannus, in “braille”, “inbook” (líbburus iscritus in símbolus), audiolibbrus e “silent book”. In prus est presenti in totus is bibliotecas de su Sistema, una sinnialética interna fata de pitogràmmas (figuras), e operativu chi, po médiu de s'umperu de tèsseras in CAA, fatzilitat su raportu fra umperadori cun abbisóngius comunicativus cumplessus e is bibliotecàrius.
15/07/2024
Biddacidru. “ Saggi musicali di Fine Anno ” 20 de Argiolas 2024
S'Iscola Tzívica de Música de Biddacidru tenit su prexu de cumbidai totus is tzitadinas e tzitadinus a sa duas seradas dedicada a is Sàgius músicalis de acabbu de annu chi si fait sàbudu 20 de Argiolas 2024, h. 20:00, in is aposentus de su ExMa (Maceddu béciu) in Biddacidru. Is istudiantis de s'Iscola Tzívica, acumpangiaus de is insenniantis, contant su percursu musicali insoru in s'annu de iscola 2023-2024. S'intrada est a indonu.
.jpg)
12/07/2024
Santu 'Èngiu. Sa Colletzioni Senis in su ExMa: is maravíllias de su Tzínema Olimpia in un'ammosta in Casteddu
Noba pigada de su giassu: sangavinomonreale.net Fiat su 1928 candu Silvio Senis, unu messaju de Santu 'Èngiu, iat detzídiu de aberri in bidda su primu tzinematógrafu púbblicu. Fiat unu tzínemachentza de cobertura in sa pratza de sa domu campidanesa cosa sua. Unu progetu chi includiat puru una posada (locanda) cun unus cantu aposentus po is operajus e is ingennieris chi trabballaànt a sa costrutzioni de sa funderia famada. Su tzínema Savoia, torrau a tzerriai Olimpia a pustis de sa Segunda Guerra Mundiali e bessiu in s'interis una sala serrada, fiat passau de babbu in fillu, abarrendi in atividadi fintzas a is primus Annus '90. In custus sessant' annus sa Famíllia Senis at custodiau prus o mancu 8000 intra de manifestus e locandinas, immui, in parti, a suta de s'amparu de sa Subraintendéntzia po mori de su valori istóricu – culturali chi tenint, e in prus is machinàrius chi testimòngiant s'istória de su tzínema in Sardigna in cussus annus. Po donai vida noba a custus repertus su Tzentru Comunali de Arti ExMa de su 11 de Argiolas a su 31 de Austu 2024 proponit un'ammosta intitulada “I manifesti cinematografici della Collezione Senis, il Cinema e l'Arte dell'Illustrazione”, chi pigat de custa colletzioni istravanada e presentat a su púbblicu 26 manifestus tzinematogràficus inéditus, locandinas, fotobustas, chi de is annus Trinta a is annus Sessanta de su Noixentus torrat a percurri s'evolutzioni de técnicas e de is maneras de comunicai.
12/07/2024
Biddacidru. “Boarding Pass Plus” - 14 de Argiolas 2024
Ispetàculu de danza intra de is matas de ollastu de sa localidadi Santu Sisinni in Biddacidru. “Scenographies Paysages – Percorsi innovativi/identitari tra paesaggio e arte performativa” – “Compagnia Le Carré des Lombes” e “Tersicorea”. “L'Altra Sardegna” e s'assótziu “Tersicorea” cun s'agiudu de su Comunu de Biddacidru, cumbidadnt totus is tzitadinus e tzitadinas a bivi un'esperiéntzia única intra de is matas de olia monumentalis de Biddacidru: unu percursu innovativu intra de Paesàgiu e Arti Performativa innui ses ballerinas si movint segundu una música – coreografia chi cumbidat is ispetadoris a iscioberai libberamenti su puntu de vista insoru. Acumpangiaus isceti de sa boxi de Elisa Zedda, dirigint su percursu e s'ispetadori in custu biaxi eciseri. S'acontéssiu est a indonu Po isceras e prenotatzionis: https://www.altrasardegna.it/prodotto/boarding-pass-plus/
.jpg)
12/07/2024
Pabillonis. Arranguitzu po adotai is canis istrangiaus in su canili cunventzionau
Su Comunu de Pabillonis donat un’arranguitzu po is chi adotant unu cani chi est strangiau in su Canili Dog Hotel e in su Canili Dog Hotel Park. Is primus cuatru mesis su Comunu donat a indonu duas abbísitas médicas veterinàrias in su canili, duas consuléntzias de informus e educatzioni cinófila e cuatru confetzionis de mangimi de 18 kg s’una. Custu arranguitzu est rivólgiu a totus is tzitadinus mancai siant residentis in Comunus diferentis. Po ndi isciri de prus ligi su regulamentu e cuntata su númeru 070948055.
.jpg)
11/07/2024
Biddanoa de Forru. Cuncertu Panky Alma in sa cresiedda de Santu Antiogu
Si fait isciri chi sàbudu su 13 de Meseargiolas, is “Amigus de Sant’Antiogu Bèciu” proponint unu merí de música in s’àrea de sa cresiedda in su sartu intra is territórius de Seddori e Biddanoa de Forru, a sa tenta de arregolli dinai po avalorai su parcu chi est a ingíriu de su monumentu. Gràtzias a is tesseramentus de su 2024, su cumitau at comporau un’àrea noa innui s’ant a torrai a fai is mureddus a sicu e s’ant a ponni dexinas de matas, a manera de fai un’àrea birdi dedicada a is pichetadas e a su parchégiu de is màchinas in logu siguru. S’apuntamentu est a is 8 e mesu de a merí (h. 20.30) cun s’animatzioni musicali a incuru de is Panky Alma, cuintetu chi fait sonus tremulosus e balladas istrumentalis, allirgaus de sa boxi de Pamela Strazzera, fundadora de is Almamediterranea, unu de is pagus grupus musicalis sardus chi at fatu música de autori; in prus s’ant a podi tastai salúminis e petza arrustia, acumpangiaus de birra e àtera cosa de bufai. Info 339 2424114 (no whatsapp) @Salviamo Sant'Antiogu becciu @Proloco Villanovaforru @ProlocoSanluri Seddòri
11/07/2024
Futei. “Festa del popolo”.
Noba pigada de sa pàgina Fb de sa Proloco Futei. Su 13 e su 14 de Argiolas 2024 in is “Campetti Polivalenti” de is oras 19:00 nc’ est sa “Festa del Popolo. Beer Festival”. S’ intrada est lìbbera. Nc’ ant a essi specialistas de sa cosa de papai e de sa cosa de buffai e totu custu at a essi accumpangiau de sa música de is duus grupus cumbidaus: is “Ridegorilla Luca Martelli su 13 de Argiolas 2024 e Modena Park Vascco Tribute Band su 14 de Argiolas 2024”.
11/07/2024
Seddori. Cunventzioni Barúmini – Seddori.
Noba pigada de sa pàgina Fb de su Casteddu Medievali de Seddori. In su mesi de Làmpadas 2023 iant firmau sa primu cunventzioni intra de sa Fundatzioni Barúmini e de su Comunu de Seddori po avalorai is risorsas turísticas-culturalis de is territórius nostrus. In su mesi de Làmpadas 2024 ant annoau custa initziativa, pentzada po intzullai e réndiri atzessivu a totus is bellesas de sa terra nostra. Arregordaus chi est ancora possíbbili bisitai su polu Museali Seddoresu (chi cumprendit Casteddu, Museu de su Pani e Museu Stóricu-Etnogràficu de is Paras Capucinus) paghendi prus pagu su billetu po s’ intrada presentendi su billetu de sa Fundatzioni Barúmini. E a s’ imbressi, chi at a presentai a Barúmini su billetu de su Casteddu Medievali de Seddori, at a tènniri unu billetu prus pagu caru po s’ intrada in cussus museus.
11/07/2024
Mara Arbarei. Festa religiosa in onori de sa B.V. de Itria e Santu Sarbadori – annu 2024
Si fait sciri a is tzitadinus interessaus ca po setzi e bessiri a cuaddu po sa prucessioni de sa Biada Vìrgini de Itria su 18 e su 20 de austu 2024, tocat a fai domanda cun su mollu chi ddoi est in su giassu de su comunu de Mara Arbarei, in s’ufìtziu protocollu e de polìtzia munitzipali o si podit pediri a su comitau chi est aprontendi sa festa. Est pretzisu ligi e firmai su “Disciplinari chi pertocat sa partetzipatzioni de is figurantis a cuaddu in ocasioni de is manifestatzionis traditzionalis, popolaris e religiosas” e intregai su mollu a s’ufìtziu protocollu de su comunu intru de sa una de cenàbara 9 de austu 2024 in manera chi si potzant donai is permissus chi spetant.
08/07/2024
Santu 'Èngiu. Su 20 de Argiolas 2024, una dí de tipizatzioni po sa donatzioni de su mueddu òsseu.
Noba pigada de su giassu: www.sangavinomoreale.net Sàbudu 20 de argiolas 2024, h- 08:00 – 12:00, s'AVIS de Santu 'Èngiu abetat is voluntàrius in sa sea de bia Fermi 11, po una dí de tipizatzioni po sa donatzioni de su mueddu òsseu organizada in collabboratzioni cun sa setzioni ADMO de Gùspini e ADMO Sardegna. Est iscéti unu prelievu de salia , pagu invasivu e lestru meda de fai. Po si iscriri in su Registru de is Donadoris de mueddu òsseu bastat fai su prelievu, chi serbit po fai sa tipizatzioni genética, e firmai s'acunsentimentu a su Registru Italianu Donadoris de Mueddu Òsseu. Is cuntrollus avatantis, po valutai s'idoneidadi efetiva de su donadori cumpatíbbili, ddus faint in ocasioni de una tzerriada, po su fatu chi sa tzerriada podit lompi annus a pustis puru de s'iscritzioni. Po una chistioni organizativa, est prevídiu unu màssimu de prus o mancu 25 prenotatzionis. Si podit prenotai s'atóbiu “on line” (in sa retza) a s'indiritzu chi sighit: https://tinyurl.com/avis-admo-2024 opuru si podit castiai sa locandina innui, in prus de is cuntatus útilis, si agatant totus is informatzionis e is rechisitus po su prelievu.
08/07/2024
Biddacidru. Unu pentzu po Ignazio Sessini a tres annus de sa morti tràgica in su logu de trabballu.
Noba pigada de su giassu: www.sangavininomonreale.net Un'istriscioni po arregordai Ignazio Sessini, trabballadori de sa Villaservice mortu tres annus a oi. Amigus e cumpàngius de trabballu si funt donaus apuntamentu in s'anniversàriu de sa tragédia a in antis de is canceddus de s'istabbilimentu, in Biddacidru. Su 5 de Argiolas de su 2021 is dipendentis bécius de sa Villaservice (azienda in s'interis serrada po fallimentu) iant agatau su corpus chentza de vida de Ignazio, iscirinau de unu isciriniadori de àliga in su turnu de a noti. Is ispriculitaus funt ses, s'ipòtesi de reatu est ”omicidio colposo aggravato” e su protzessu funt ancoras fadendi·ddu. S'istriscioni nou, fatu a manu e acumpangiau de duus matzus de froris, narat “Ignazio abarras sémpiri in sa memória de su coru nostu” e si aciungit a s'istriscioni chi de annus pedit “Beridadi e Giustítzia po Ignazio”. Una tragédia chi si fiat pótzia evitai si a Ignazio non dd'iant lassau a solu a su turnu de a noti e si su machinàriu iat tentu is dispositivus de seguresa. “ Una tragédia e unu buidu enormi abarrant intra de nosu – iscrint is familiaris in “Facebook” - Gràtzias de coru a is personas chi custu mengianu ant bófiu apicai custu istriscioni in s'istabbilimentu, est sa dimostratzioni chi dónnia dí ses in is petzus nostus e insoru. S'arregordu nostu non morit mai”.
08/07/2024
Seddori. Santu Antiogu by Night.
Noba pigada de sa pàgina Fb de Santu Antiogu Bécciu. Sàbudu su 13 de Argiolas 2024, is “Amici di Santu Antiogu Becciu”, proponint unu merì in música, in s’ àrea de sa cresiedda de sartu intra de Seddori e Biddanoa de Forru, cun sa punna de arregolli fundus po sa valorizatzioni de su parcu a inghíriu de su monumentu. Gràtzias a is tesseramentus de su 2024, su comitau at comprau un’ àrea noba, innui at a essi torrada a fai sa muredda e prantadas matas meda, po cuncordai un’ àrea birdi dedicada a su pic-nic e a su parchégiu in seguresa po is màchinas. S’ atóbiu est a partiri de is oras 20:30 cun s’animatzioni musicali fata de su grupu Panky Alma cun sonus vibrantis e baddadas strumentalis, cantat Pamela Strazzera, fundadora de is Almamediterranea, unu de is pagus grupus sardus a fai música d’ autori. Nc’est fintzas sa possibbilidadi de papai gaúngiu e spiedinus a sa braxi, accumpangiaus de birra e àteras cosas de buffai
08/07/2024
Seddori. Prima bisita ghiada in sardu.
Noba pigada de La Gazzetta del Medio Campidano. Sa primu bisita ghiada in sardu in su Polu Museali dd’ant fata su 30 de Làmpadas 2024 e is protagonistas fiant una truma de turistas lòmpius de su Sulcis-Iglesienti. In sa dii de s’anniversàriu de sa Batalla de Seddori, su 30 de Làmpadas de su 1409, is operadoris culturalis de sa lìngua sarda ant contau in sardu is contus de sa batalla intra de sa Corona de Aragona e de su Rennu Sardu, ant bisitau su casteddu innui iant fatu s’afracada de acabu is trupas de Martino il Giovane d’Aragona, ant bisitau su Museu de su Pani e su Museu Stóricu Etnogràfocu de is Capucinus. “In s’annu innui non nc’est sa rievocatzioni stórica chi si fait ónnia dus annus – narat su síndigu Alberto Urpi – non nci podiat essi dii mellus po cuncordai sa primu bisita ghiada in sardu in su casteddu e in is logus de Sa Batalla. Cumenti amministratzioni creeus meda in su torrai a scoberri e amparai sa cultura nostra, is traditzionis e is valoris de s’ identidadi nostra. Spereus chi custu acuntéssiu siat sceti su primu de meda”. Sa giornada de bisita ghiada in sardu in su Polu Museali dd’ant organizada gràtzias a su Progetu Terras de Marmilla, Linas e Campidanu finantziau de sa Regioni Sardigna cun su Comunu de Seddori cabufila. Is 30 turistas a s’acabbu de sa bisita ghiada ant passilau po Seddori po ndi aproillai a su Parcu s’ Arei innui ant apretziau s’ àrea birdi e su pràngiu in su ristoranti nou de su parcu.
07/07/2024
Santu 'Èngiu. Su Tzínema Olimpia bessit unu Museu de s'Immàgini e de is Artis Visualis.
Noba e fotografias pigadas de su giassu: www.sangavinomonreale.net Prus de Cicuanta annus at fatu s'istória de sa bidda e at portau su tzínema in Santu 'Èngiu, cun una sala de prus de 500 postus giai sémpiri prena, in s'àngulu intra de bia Roma e V.li Triesti. Aici su messaju Silvio Senis in s'oramai atesu 1928, in períodu fascista, iat detzídiu de aberri unu tzínema, s'atividadi dd'ant portada in antis is nebodis fintzas a is primus Annus '80. E immui, unu patrimóniu arricu, costituiu de 751 documentus intra de manifestus e locandinas de film, at oténniu su vínculu de su Ministeru po is Benis e is Atividadis Culturali, custu ddu custódiat Giorgio Senis, 63 annus, nebodi de Silvio, chi at giai fatu un'ammosta fadendi un'iscioberu intra de fotografias istóricas e manifestus de film, ma sa punna est meda prus manna: " In custus detzénnius longus apu custodiau custu patrimóniu arricu chi andat asuta de su nómini de Colletzioni Senis e immui sa punna mia est sa de creai su primu Museu de s'Immàgini e de is Artis Visualis in Sardigna. Cun totu su materiali chi téngiu est possíbbili torrai a bivi is logus e is personas de Santu 'Èngiu in is Annus '50 – '80 e cumprendi cumenti is immàginis tzinematogràficas de su períodu, ant modellau is gustus e is cumportamentus de sa Comunidadi". Su tempus parit chi s'est firmau in sa sala tzinematogràfica istórica e ancoras oi artziendi is iscaleris est possíbbili intrai in sa cabbina de projetzioni chi donat a sa sala: " Tenemu iscéti 10 annus – contat cun emotzioni Giorgio Senis – candu carrigamu sa pellícula po is film in projetzioni e po mimi fiat calincuna cosa de màgicu, mi intendemu importanti. A s'inghitzu is projetzionis fiant a s'abertu ma pustis iant fatu sa cobertura chi at portau a s'istrutura atuali. Sa serrada de su tzínema fiat dépia prus che totu a sa nàscida de is televisionis privadas chi projetant a pustis pagu tempus is film chi donant in sa nosta e in àteras salas tzinematogràficas. Eus allogau su projetori VictoriaV, chi umperàt su "Nuovo Cinema Paradiso". A pustis in is Annus '80 arribbat sa serrada de su tzínema Olimpia: " Emus abertu una discoteca chi est abarrada aberta fintzas a is Annus '90. Immui boleus portai a in antis unu progetu ambitziosu e seus circhendi s'agiudu de privaus o de fundatzionis chi siant interessaus a custu patrimóniu. Su tzínema nostu at fatu s'istória de Santu 'Èngiu e at portau puru modellus culturalis nous cun is film americanus e no isceti, chi ant agiudau a modernizai sa bidda nosta. De pagu apu comporau de unu tzínema de Ilartzi unu projetori chi bollu torrai a ponni in funtzioni". Su progetu de sa Colletzioni Senis at tentu s'acunsentimentu de su napoletanu Guido Cabid, chi de annus bivit in Sardigna, 67 annus curadori de ammostas e diretori de gallerias de Arti importantis in Roma, Milanu e Nàpoli. " Su recúperu de su fàbbricu iat a permiti a sa Comunidadi de Santu 'Èngiu e a totu su Campidanu de Mesu de tenni unu cuntenidori culturali cun una colletzioni única in Sardigna, cun una série de logus polifuntzionalis in gradu de istrangiai atividadis diferentis cun valori sotziali e culturali, in is formas de su tzínema, videu, fotografia. "performance", cun "book shop", salas de projetzioni, archíviu, biblioteca, labboratóriu de restauru cumenti a totus is museus de su mundu. Unu de is obietivus printzipalis de su progetu est s'avaloramentu de sa memória istórica de su rolu sotziali chi custa istrutura at tentu in passau po custa comunidadi. S'arregorta, custodiada cun grandu atentzioni e amori, costituiscit, difatis, s'atestatzioni materiali chi su tzínema, in unu arcu de tempus longu, at costituiu po sa comunudadi de Santu 'Èngiu unu logu privilegiau de agregatzioni e sotzializatzioni, tenendi unu valori demoetnoantropologicu innegàbbili".
06/07/2024
Mara Arbarei. Spetàculu de ballu
Sa scola de ballu All Dance de Mara Arbarei tenit su prexeri de arriciri a totus is chi s’ant a bolli acostai a Pratza de Corti po biri su spetàculu de ballu de is scientis insoru, sàbudu 6 de argiolas 2024 a ora de is dexi de noti. In s’interis at a essi abertu fintzas unu chiosco de su comitau de sa Madonna d’Itria innui s’ant a podi comporai fintzas is billetus de sa loteria. Primu prèmiu unu scooter 125 cc
.jpg)
05/07/2024
Seddori. Piscina Comunali.
Sa piscina comunali est aberta a su púbblicu de su 4 de su mesi de Argiolas. Oràrius de abertura Totus is diis de is oras 09:30 a is oras 19:30 Prétziu po intrai de su Lunis a su Cenàbara: Giornada intrea éurus 6 De is oras 15:00 éurus 4 Prétziu po intrai su Sàbudu e su Domínigu: giornada intrea èurus 7 de is oras 15:00 éurus 5 Postatzionis: 1 letixeddu de is 4 a is 6 éurus (segundu sa dii e s’ oràriu) 2 letixeddus e unu ombrelloni de is 9 a is 14 éurus (segundu sa dii e s’ oràriu) Is pipius asuta de is 6 annus (impari a unu mannu) intrat a indonu Funt prevídias promotzionis po is famílias.
05/07/2024
Seddori. Tesina de sa de tres média. Noba pigada de s’ Unione Sarda.
A s’esàmini de licéntzia média chistionat in sardu: “Est stétiu bellu meda a scriri e contai cun su linguàgiu suu sa Sardigna mia”. Giulia Vacca, 13 annus, studianti de su Istitutu Cumprensivu de Seddori, at ispantau sa commissioni d’esàmini candu at puru incarrerau a sonai “No potho reposare”. Unu trabballu arribbau a pustis de sa collaboratzioni Comunu- Scola cun su Progetu “Terras de Marmilla, Linas e Campidanu, finantziau de sa Regioni Sardigna cun 100 milla éurus, cun su Comunu de Seddori cabufila. “A s’incarreru nimancu deu nci creiat de arribbai a sa fini – contat Giulia – dd’ammitu, apu fadiau. Una marrania chi apu bintu gràtzias a mamma Roberta e babbu Jonathan”. Contat: “Is cumpàngius mius iant giai sceberau s’ allega po s’esàmini, deu no, nd’apu chistionau in domu e mamma mia m’ at contzillau sa Sardigna. Ta bellu, apu pentzau, su bisu miu, chiostionai ananti de is professoris in sardu e contai su passau candu giai a tres annus, in sa scola de s’infantzia, is primas cantzonis chi apu imparau fiant in sardu, cantadas in costumu sardu, chi impreu ancora.” Agatai nobas apitzus de sa Sardigna e ddas acapiai giai est simpli, ma cumenti fai a ddas tradusi? “Non mi seu arréndia. Seu andada in Comunu, in su Sportellu de Língua Sarda. S’operadora Giorgia Serpi m’at fatu de professora. Cun issa e cun is professoris mius apu incarrerau unu trabballu intitulau -Sa Sardigna-”. “Non est una chiostioni d’ esàmini, is primus fueddus mius fiant in sardu. Candu seus in sa mesa, candu seus totus impari, babbu miu arrespundit sceti si chistionaus in sardu. Est un’arrégula.” Sa padronia de linguàgiu at ispantau sa commissioni , cun sa dirigenti Cinzia Fenu. “Un’ esperiéntzia emotzionanti – contat sa professora Roberta Maccioni – po sa scola nostra. Giulia, realizendi su bisu suu, at lassau a nosu unu cunsideru: essi acapiaus a is arréxinis e a su passau, arricai su presenti e castiai cun speràntzia su benidori”. “A nómini de totu s’amministratzioni – narat su sìndigu Alberto Urpi – fatzu is cumplimentus a sa picioca, una letzioni de amori po sa terra nostra. Acuntéssiu po amparai su progetu apitzus de sa língua e de sa cultura Sarda chi sa Regioni sighit de annus. In custu progetu funt 12 is comunus chi ant trabballau impari. Cun initziativas medas. Sa ceréxia in sa turta? S’ esàmini in sardu de is piciocus e piciocas, su benidori nostru”.
.png)
05/07/2024
Tzitadi de Seddori. Funt abertas is iscritzionis po su labboratóriu in Língua Sarda po pipias e pipius “Sinnus”.
S'Ufítziu de Língua Sarda de su progetu Terras de Marmilla, Linas e Campidanu in collabboratzioni cun sa Tzitadi de Seddori organizat su labboratóriu in Língua Sarda de “SINNUS”, impari a s’artista seddoresu Lello Porru, chi si fait de su 15 fintzas a su 18 de Argiolas 2024, h. 08:00 – 12:00, in Seddori, bia Orsini 7. Su labboratóriu fait parti de is atividadis culturalis in Língua Sarda de su progetu “Terras de Marmilla, Linas e Campidanu” finantziau cun su dinai de sa Regione Autònoma de Sardigna cunformas a sa L. 482/99 e sa sa L.R. 22/2018. Su labboratóriu est a indonu. Podint partitzipai non prus de 20 pipias e pipius de is 10 fintzas a is 13 annus. Po si iscriri ddoi at tempus fintzas a h. 12:00 de su 13 de argiolas 2024. Is mollus de iscritzioni ddus agatais in su giassu: www.terrasdemarmilla-linas-campidanu.com e si depint mandai cumpilaus a: semm9993@gmail.com Po informatzionis podeis mandai unu messàgiu WhatsApp a su númunu: 3475371730 Calendàriu: 15, 16,17, 18 de Argiolas 2024 h. 08:00 – 12:00.
04/07/2024
Santu 'Èngiu. “Mamblo Art Mostra Pop”: unu biaxi oroginali in s'arti de Paolo Mazzucco.
Noba pigada de su giassu: www.sangavinomonreale.net Santu 'Èngiu si preparat a istrangiai un'ammosta personali dedicada a is òperas pitóricas de Paolo “Mamblo” Mazzucco, artista santuingesu de importu in su movimentu muralísticu e in sa Street Art cuntemporànea in Sardigna. S'ammosta, intitulada “Mamblo Art Mostra Pop”, si podit bisitai de su 2 de argiolas 2024 in “C'Entro”, in bia Santa Croce 11. Paolo Mazzucco, nómini de arti “Mamblo”, nascit in Torinu e giai de gióvunu ammostat una grandu passioni po su disénniu e prus che totu un'interessamentu particulari po su fumetu. Cun su tempus, Mazzucco si acostat a sa pintura, incumentzendi cun su biancu e nieddu, po isperimentai a pustis s'umperu de su colori. Custa créscida ddu portat a una carriera de muralista, cun unu ogu de riguardu a s'arti cuntemporànea e, in particulari, a sa Pop Art. Intra de is òperas suas prus famadas cumenti a “street artist”, ddoi at “Gigi Riva e lo Scudetto del Cagliari” e “Piazza della Musica” in Santu 'Èngiu, “Grazia Deledda” in Macumere e “Mario Tiddia” in Sarrocu. Custus murales, cun s'istili distintivu insoru e is coloris biatzus, ant cuntribbuiu a difiniri s'identidadi visiva de is logus innui ddus ant fatus, fadendi bessiri s'artista santuingesu connotu e apretziau in totu s'Ísula.
04/07/2024
Santu ‘Èngiu. Su 13 de Argiolas torrat su “Carnevale Estivo Sangavinese”.
Noba pigada de su giassu: sangavinomonreale.net In Santu ‘Èngiu est totu prontu po sa de 3 Editzionis de su “ Carnevale Estivo Sangavinese”. Ocannu puru lompit sa grandu festa istadiali dedicada a mannus e piticus, chi ponit in programma colori, música e ispàssiu! Sàbudu 13 de Argiolas 2024 s’isfilada cun is grupus Fibra Ottica e rewind Carnival Group partit de is seti de a merí (h. 19:00) in bia Roma ( prus o mancu a tretu de is “Giardinetus” e sighit fintzas a su Cunventu. Antonella Caboni, presidenti de sa Pro Locu de Santu ‘Èngiu, est operativa paris cun totu su Diretivu po s’organizatzioni de s’acontéssiu: “ Is parafritus de sa Pro Loco indúrciant sa serada po totus – ispricat – e ddus donant a indonu a totus is partitzipantis e is ispetadoris. Est una festa allirga, ispassiosa chi donat continuidadi a su trabballu mannu de is carristas in vista de is isfiladas de su Carnevali Stóricu”. A s’arribbu in sa pratza a nanti su Cunventu de Santa Luxia sa festa sighit cun música, baddus e puntus de ristoru de is carristas.
04/07/2024
Biddanoa de Forru. Ammosta-Acontéssiu “Gigi Riva s’Únicu Tronu”
Unus cantu mesis a oi s’at lassau unu grandu personàgiu: Gigi Riva, sardu de afillamentu, bandera de su Casteddu e de sa Natzionali, campioni de isportividadi, umanidadi e identidadi. Cun is impresas suas at fatu connosci a su mundu s’Ísula nosta, agiudendi a rennovai sa mannosia no iscéti isportiva de is Sardus, chi dd’ant istrangiau sèmpiri cun prexu, in s’istàdiu e in is biddas chi abbisitàt. E fintzas Biddanoa de Forru dd’at istrangiau, in su 1982, candu iat acumpangiau su “Cagliari Calcio” de Piras, Uribe, Marchetti e Victorino, allenaus de Gustavo Giagnoni, candu si fiat incingiau su campu isportivu in erba, chi is giornalistas iant definiu mellus de su Sant’Elia, chi in cuss’ora dd’assimbillànt a unu campu de patatas. E est po cussu puru chi s’istitutzioni museali de Biddanoa de Forru, incingiada cuss’annu etotu, bolit arregodai su mitu cun un’ammosta de arti colletiva dedicada a issu. S’ammosta-acontéssiu “Gigi Riva s’Únicu Tronu”, a incuru de Alessandra Sorcinelli, s’at a incingiai cenàbara su 26 de Meseargiolas a is 7 de a merí (oras 19.00) in sa Sala Ammostas de su Museu Archeológicu de Biddanoa de Forru e si podit abbisitai a indonu fintzas a cenàbara su 2 de Austu (h. 9.00 – 13.00 / h. 15.30 – 19.00, foras de su lunis) Programma de Cenàbara su 26 de Meseargiolas - Saludus de is Istitutzionis, de istudiosus e testimòngius - Interventus de is grandus giogadoris de su Casteddu 1969/70 - Presentada de s’arregorta de poesias cun leturas emotzionalis espressivas in sardu, bogadas de s'Antologia Il Bomber Poeti di Sardegna per Gigi Riva, lfa editori - Incingiadura de s’Ammosta de Arti Colletiva a tema, Il Bomber Gigi Riva - Labboratóriu improvisau - Presentada de is artistas e de is òperas insoru Info 070 9300050 / 333 1760216
04/07/2024
Biddanoa de Forru. Aina de su mesi de Làmpadas 2024: Mola a majolu o mola arega.
De su séculu V i.C. in Grécia si cumintzat a imperai una genia de mola noa in pedra chi fiat fata in duus arrogus, su de asuba cun un’istampu – majoulu – innui ghetànt su lori. Sa mola funtzionàt a manu, cun unu prapali de linna chi un’operadori moviat lateralmenti po istrecai su trigu e ddu fai diventai farra. Custa genia de mola si fiat ispainada fintzas in su mundu púnicu e dd’iant umperada, in certas àreas, fintzas a su I sèculu p.C.
04/07/2024
Sàrdara. Ammosta bibbiogràfica “Rombo rosso – blu”.
Po totus is amantiosus de càlciu e de is coloris arrúbiu – blu de su Casteddu, sa biblioteca comunali de Sàrdara de su 1 a su 20 de su Mesi de Argilas, proponit un’ ammosta bibbiofràfica cun un’ arregolta de totus is libbrus, chi tenit su Sistema Bibliotecàriu Monte Linas, chi ammostant sa palistória de sa scuadra de càlciu prus amada de is tifosus sardus e non sceti de issus. De sa fundatzioni a su scudetu miríficu de su 1970 de Riva, Scopigno e is àterus erois de sa cavalcada ispantosa chi at portau su primu scudettu a s’ Itàlia meridionali, fintzas a arribbai a is contus de is fortunas alternas chi sa scuadra at bìviu fintzas a oi. S’ammosta si podit bisitai in is oràrius de abertura de sa biblioteca.
02/07/2024
Stàini - Tzitadi de Seddori. Funt abertas is iscritzionis po su labboratóriu in Língua Sarda po pipias e pipius “Tzaca su RAP”.
S'Ufítziu de Língua Sarda de su progetu Terras de Marmilla, Linas e Campidanu in collabboratzioni cun Stàini - fratzioni de sa Tzitadi de Seddori - organizat su labboratóriu po pipius e pipias in Língua Sarda de “RAP” e Cultura “HIP HOP” “Tzaca su RAP” chi si fait a inghitzai de su 16 de Argiolas 2024, dónnia martis, h. 16:30 – 19:30, in sa Scola Elementari bécia de Stàini. Is letzionis de su labboratóriu ddas fait Quilo Sa Razza, artista mannu de Rap in sardu. Su labboratóriu fait parti de is atividadis culturalis in Língua Sarda de su progetu “Terras de Marmilla, Linas e Campidanu” finantziau cun su dinai de sa Regione Autònoma de Sardigna cunformas a sa L. 482/99 e a sa L.R. 22/2018. Su labboratóriu est a indonu. Podint partitzipai non prus de 20 pipias e pipius a inghitzai de is 6 fintzas a is 11 annus. Po si iscriri ddoi at tempus fintzas a sa una (h. 13:00) de su 14 de Argiolas 2024 Is mollus de iscritzioni ddus agatais in su giassu: www.terrasdemarmilla-linas-campidanu.com e si depint mandai cumpilaus a: a.caboni@comune.sanluri.su.it Po informatzionis podeis mandai unu messàgiu WhatsApp a su númeru: 3890191709 Calendàriu: 16, 23,30 de Argiolas 2024 h. 16:30 – 19:30 6, 20, 27 de Austu 2024 h. 16:30 – 19:30 3, 10, 17, 24 de Cabudanni 2024 h. 16:30 – 19:30
02/07/2024
Biddanoa de Forru. Archeofestival 2024.
De su 13 a su 21 de Meseargiolas 2024 in Biddanoa de Forru si fait su Nurarcheofestival, su Teatru contemporàneu in is sítius archeológicus de Sardigna. Is abbísitas ghiadas si podint fai innantis de is ispetàculus, po si prenotai si podit tzerriai o mandai unu messàgiu whatsapp a su 3331760216. Innoi su programma cumpletu: - 13/15 de Meseargiolas, in sa Iscola Elementari in su Cursu V. Emanuele 3, “Mi Ritrovai” Labboratóriu Teatrali apitzus de is temas de Dante e Cervantes, condusit Marco Martinelli, produtzioni Teatro delle Albe - 13 de Meseargiolas h. 19.00, in s’àrea archeológica de Pinn’e Maiolu, “Sas Comares Luvolesas”, cun Elena Musio, Teresa Loi e Rosa Beccu, produtzioni de Ilos Teatro - 13 de Meseargiolas h. 20.15, in s’àrea archeológica de Pinn’e Maiolu, “Sa Sangia Malacarne” de e cun Daniela Littarru, regia de Antonello Murgia, produtzioni Teatro dallarmadio - 14 de Meseargiolas h. 18.00, in su parcu archeológicu Genna Maria, “Zatò & Ychì”, progetu regia e costumus Senio G. B. Dattena, coreografia de dantza Valeria Russo e Lucas Monteiro Delfino, percussionis Marco Caredda, ASMED Balletto di Sardegna - 14 de Meseargiolas h. 20.15, in sa Iscola Elementari in su Cursu V. Emanuele 3, “Tutto tranne Gramsci” libberamenti ispirau a “Le donne di Casa Gramsci” de Mimma Paulesu Quercioli, regia Susanna Mameli, cun Marta Proietti Orzella, in vídeu Renata Manca, produtzioni Anfiteatro Sud - 14 de Meseargiolas h. 21.30, in s’àrea archeológica de Pinn’e Maiolu, “Ruth. La casa comune: Rifugio e Risonanze” cun sa dantzadora Francesca Cola, produtzioni Associazione Didee, presentat Carovana SMI - 16 de Meseargiolas h. 16.00, in s’àrea archeológica de Pinn’e Maiolu, “Mi Ritrovai. Esito laboratorio teatrale” cun is tzitadinas e tzitadinus apitzus de is temas de Dante e Cervantes, condusit Marco Martinelli, produtzioni Teatro delle Albe - 18 de Meseargiolas h. 18.00, in su parcu archeológicu Genna Maria, “Il Venditore di Fiabe”, cun Gianluca Podda (ghitarra) e Giusy Murgia (boxi) produtzioni Palazzo d’inverno - 18 de Meseargiolas h. 19.00, in su parcu archeológicu Genna Maria, “Nata Vicino ai Fantasmi. Nata Tempesta”, unu diàriu de ascurtai in cúfia, regia Giorgina Pi, Compagnia Bluemotion - 18 de Meseargiolas h. 20.00, in su parcu archeológicu Genna Maria, “Arianna nel labirinto” de Vito Biolchini cun Salima Balzerani, música originalis de Stefano Casta e Enrico Sesselego, regia Vito Biolchini, produtzioni Noa Il Crogiuolo - 18 de Meseargiolas h. 21.30, in s’àrea archeológica de Pinn’e Maiolu, “La Canzone di Giasone e Medea editzioni noa”, de Euripide a Seneca, de Apollonio Rodio a Franz Grillparzer e Jean Anouilh, progetu e elabboratzioni drammatúrgica Elena Bucci e Marco Sgrosso cun Elena Bucci e Marco Sgrosso, Nicoletta Fabbri, Francesca Pica e Valerio Pietrovita, produtzioni Le belle bandiere, Tzentru Teatrali Brescianu - 19 de Meseargiolas h. 18.00, in su parcu archeológicu Genna Maria, “Come d’Incanto”, testu e regia de Monica Corimbi, produtzioni Bocheteatro - 19 de Meseargiolas h. 19.30, in sa Iscola Elementari in su Cursu V. Emanuele 3, “Why Clitennestra, Why?” cun Miana Merisi, regia Maria Assunta Calvisi, produtzioni L’Effimero Meraviglioso e Asmed - 19 de Meseargiolas h. 21.30, in s’àrea archeológica de Pinn’e Maiolu, “Vestita di Lui”, poesias de Sandro Penna cun Iaia Forte - 20 de Meseargiolas h. 18.00, in sa Iscola Elementari in su Cursu V. Emanuele 3, “Cammina Cammina Lucertolina” cun Maura Grussu e Nanni Melis, músicas de Ottavio Farci e Veronica Maccioni, regia Giampietro Orrù, produtzioni Fueddu e Gestu - 20 de Meseargiolas h. 20.00, in su Museu archeológicu in Pratza Costitutzioni 4, “La Strada che va in città” de Natalia Ginzburg cun Valentina Cervi, regia Iaia Forte, vídeu-installatzionis Giovanni Frangi, produtzioni Pierfrancesco Pisani Infinito srl Coop. CMC/Nido Ragno, in collabboratzioni cun Riccione Teatro/Spazio Tondelli - 20 de Meseargiolas h. 22.00, in Pratza Municipio, “La Via del Popolo” de e cun Saverio La Ruina, produtzioni Scena Verticale - 21 de Meseargiolas h. 18.00, in su parcu archeológicu Genna Maria, “Alla ricerca dei Nuragici”, teatru de figura cun atoris e buratinus, ideatzioni e regia Ivano Cugia cun Eliana Carrus, Ivano Cugia e Andrea Gandini, produtzioni Origamundi (teatro ragazzi) - 21 de Meseargiolas h. 19.30, in s’àrea archeológica de Pinn’e Maiolu, “Decameron” cun Paolo Panaro, produtzioni Compagnia Diaghilev - 21 de Meseargiolas h. 22.00, in s’àrea archeológica de Pinn’e Maiolu, “Tutto Brucia Soundtrack” cun R.Y.F. Francesca Morello, produtzioni cumpangia Motus.
.jpg)
02/07/2024
Serrenti. Eva Rasano (prémiu Andersen 2024) in biblioteca.
Gióbia su 4 de Meseargiolas 2024 sa Biblioteca Comunali de Serrenti "Francesca Sanna Sulis" at a tenni su prexeri de strangiai Eva Rasano, autora e illustradora de líbburus po pipius, Prémiu Andersen 2024 cun s'ópera sua "Merlino, dove vai?" De is 10 de a mengianu si fait unu labboratóriu po pipius de is 3 a is 8 annus de edadi. Ddoi est presenti "La storia infinita libreria e cartoleria" cun is cópias de is líbburus de fai autografai a s'autora. S'acontéssiu est organizau in collabboratzioni cun su Comunu de Serrenti, su Sistema Bibliotecàriu Joyce Lussu e cooperativa Tesauro.
.jpg)
02/07/2024
Biddanoa de Forru. Si circant aspirantis atoris po unu Labboratóriu Teatrali.
In ocasioni de su Nurarcheofestival chi si fait in Biddanoa de Forru de su 13 a su 21 de Meseargiolas, cun 19 acontéssius teatralis, musicalis e poéticus, si fait unu labboratóriu teatrali cun su títulu “MI RITROVAI”, chi pigat ispiratzioni de is primus duus cantus de s’Inferru de sa Divina Commédia de Dante, chi s’ant a ammesturai a arrogheddus poéticus de Emily Dickinson, Vladimir Majakovskij, Walt Withman e àterus poetas de sa costellatzioni de su “Prugadóriu de is poetas”, cun sa diretzioni de Marco Martinelli, drammaturgu e regista intra is prus apretziaus de su panorama teatrali italianu. Su labboratóriu, chi si fait in is aposentus de s’Iscola Elementari de Biddanoa de Forru de su 13 a su 15 de Meseargiolas, est una corali formada de 50 personas de dónnia edadi e ndi podint fai parti totus, mancai no tengant isperiéntzia teatrali peruna. Chini est interessau si podit iscriri a indonu mandendi unu messàgiu whatsapp a su númeru 3348821892.
02/07/2024
Gùspini. Campus BaB 2024
At a essi un’istadi de arti, música e créscida personali sa de su Campus BaB 2024. Partitzipendi a su Campus BaB 2024 de s’1 de Meseargiolas a su 2 de Austu in su BabLab (ex iscola edili, a faci de Pratza Togliatti in Gùspini) is piciocheddus ant a tenni sa possibbilidadi de bivi un’isperiéntzia única de créscida e formatzioni! In in dís de su Campus s’at a iscoberri su mundu de s’arti, de sa música, de su tzínema, de su teatru e àteru ancora, trabballendi impari po fai un’ambienti eciseri e fantasiosu. Su campus est rivólgiu a is piciocheddus de is 14 a is 20 annus cun intrada de su lunis a su cenàbara, de is 9 oras a sa una e mesu (9.00-13.30). Po pediri informatzionis e po s’iscriri, si podit cuntatai a Sofia Dessì in Instagram @sofia13_02 o in WhatsApp a su 3319218429 (po da tzerriai, de is 4 a is 8 de a merí).
02/07/2024
Serrenti. Presentada de su líbburu Il Medico di Caller.
Su 6 de Meseargiolas 2024 a is 8 de a merí in sa Domu Bellu-Medda in Bia Romagna 25 in Serrenti ddoi at s’apuntamentu nou de s’arressigna Librus & Lollas, s’acontèssiu organizau de sa Biblioteca Comunali de Serrenti "Francesca Sanna Sulis" in collabboratzioni cun su Comunu de Serrenti, Sistema Bibliotecàriu Joyce Lussu e sa Cooperativa Tesauro. In custa ocasioni ddoi at unu moderadori primorosu chi est Ciro Auriemma, chi at a presentai su romanzu nou de Graziella Monni cun su títulu "Il Medico di Caller", lómpiu in is libbrerias una parigas de dís scéti. Est unu romanzu arricu e passioneri, chi ponit in iscena batallas e murigus, aventuras in mari e ingannus de corti: Graziella Monni si contat s’atóbiu e s’atúmbidu intra duus mundus e duas religionis. Jacopo e Violante, cumenti a Romeo e Giulietta, cun sa stória de amori insoru funt in mesu a una pintura memoràbbili, in unu Cincuxentus Sardu cinciddosu. Cumenti a sèmpiri ddoi funt is de "La storia infinita libreria e cartoleria", cun is cópias de su líbburu disponíbbilis po si ddas fai autografai de s’autora, e is amigas de s’Assótziu "Il sentiero dei libri" chi ant a fai unas cantu leturas bogadas de su romanzu de Graziella Monni.
28/06/2024
Serrenti. Torrat a aberri sa piscina comunali pustis de unus cantu mesis de trabballus
Noba pigada de su Sardington Post Funt acabbaus in Serrenti is trabballus de manutentzioni istraordinària de sa piscina comunali. S’impiantu isportivu dd’iant serrau in su 2021 po mori de is costus de gestioni tropus artus po sa sostziedadi chi dda teniat in gestioni, e a cumintzai de Meseidas 2023 ddoi ant fatu trabballus mannus: manutentzioni istraordinària de agualamentu de sa vasca; càmbiu de is impiantus de sa tzentrali térmica; manutentzioni de s’impiantu elétricu; interventus de agualamentu de is ispàtzius aintrus de is ispolladroxus; revisioni de is serramentus; càmbiu de is manillionis antipànicu e de is imbirdis segaus; càmbiu de s’impiantu de limpiadura de s’àiri e de is boiler po s’àcua callenti sanitària; càmbiu de is arregiolas segadas. Totus custus trabballus funt costaus 560milla éurus, chi si funt pagaus gràtzias a unu finantziamentu oténniu de una fórmula particolari de cuntzessioni previdia po is assótzius isportivus. «Is trabballus – at nau Maura Boi, visu-síndiga de su Comunu de Serrenti – funt acabbaus cun s’arrelàsciu de su Tzertificau de faidura regulari. Infinis podeus donai a sa bidda un’impiantu po nadai siguru e ecologicamenti primorosu, gràtzias a unu sistema ídricu-sanitàriu nou chi permitit de arresparmiai prus de su 60 po centus de s’àcua». Immoi po 16 annus s’impiantu dd’at a gestiri sa Fipsas (Federazione Italiana Pesca Sportiva ed Attività Subacquee), chi est giai in atividadi po pigai is prescritzionis po s’atóngiu, chi cumintzat in cabudanni. «Custu – at nau ancora Maura Boi – est unu serbítziu de importu mannu po Serrenti e po is comunus acanta, difati funt medas is adesionis arritzias de is famíllias de su Campidanu de Mesu e pruschetotu de Samassi e Serramanna. Seus abetendi sa formalizatzioni de s’Ufítziu técnicu apitzus de s’agibbilidadi de s’istrutura, chi est po torrai a aberri a su púbblicu po ddi donai unu logu de isport, arrecreu e benéssiri».
28/06/2024
Biddacidru. Sa de 6 Editzionis de “La Notte delle Chitarre Nascenti”. 6 de Argiolas 2024
Torrat ocannu puru “La Notte delle Chitarre nascenti -VI edizione”, su cuntzertu de acabbu de annu de is chitarristas de s'Assótziu “You Can Play – Guitar School”, cun s'agiudu de su Comunu de Biddacidru. De su “Rock” a su “Punk”, de su “Pop” a su “Heavy Metal”: una noti màgica arricada cun cantzonis de dónnia generi musicali sonadas de prus de 60 istudiantis de dónnia edadi. S'atóbiu est sàbudu 6 de Argiolas 2024, h. 20:30, in su chiosco “Sa Spendula”.