14/11/2024
Serrenti. Bessida a S’Alighera po genti manna
Si fait isciri a is chi funt interessaus chi cenàbara su 15 de Donniasantu 2024 in sa Domu Corda de is oras 8:30 a is oras 12:30 s’arregollint is iscritzionis po sa bessida a S’Alighera chi si fait su 6 e 7 de Meseidas 2024. Si cunsillat de arribbai cun su mollu giai cumpilau. Is mollus si podint iscarrigai in su giassu de su Comunu de Serrenti o pigai in s’Ufítziu Protocollu. Is costus de su biaxi e de is acumpangiadoris ddus pagat su Comunu, is partetzipantis ant a depi pagai is costus de pernotamentu e is pràngius e is cenas. Sa cuota de partetzipatzioni est de € 140,00 chi si depit versai sa dí chi si fait s’iscritzioni. Si podint arriciri unu màssimu de 51 domandas pigadas in s’órdini de cumenti lompint. Po informus in prus si podit cuntatai su númeru 380751448.
14/11/2024
Gùspini. Atóngiu de autori, su de tres apuntamentus
Su de tres apuntamentus de “Atóngiu de Autori” est unu biaxi intra de is figuras femmininas chi Fabrizio de André at contau in totu sa carriera cosa sua. “Le donne (il tempo e il governo)” esprorat figuras diferentis chi funt alliongiadas a sa poética de su cantautori genovesu chi at contau un’isciacumannu de fémminas aintrus de is cantzonis suas: de Nancy a Maria, de Marinella a Princesa. Is branus, chi ddus intèrpretat Matteo Sau, s’ant a donai su càmbiu cun is leturas chi fait Giacomo Casti chi at a contai is curiosidadis, is fueddus e is isciàscius de De Andrè. Nci ant a essi puru is contus de Alessia Farci chi, aintru de su biaxi, s’at a firmai apitzus de unas cantu riflessionis chi pertocant su mundu femmininu de su cantautori. S'apuntamentu est cenàbara su 15 de Donniasantu a is 18.30 in is aposentus de su Molinu Garau in bia Santa Maria in Gùspini.
14/11/2024
Gùspini. Presentada de líbburus culturalis apitzus de su mari
Su 14 e 15 de Donniasantu s'Assótziu Natzionali Marineris de Itàlia, cun s’amparu de su Comunu de Gùspini e sa collabboratzioni de “Bimbi a Bordo” e Universidadi Popolari de Pistoia, incíngiat sa témpora ierrili de “Atóbiu cun s’autori” cun sa presentada de duus líbburus apitzus de su mari in is aposentus de su Montigranàticu: - Gióbia su 14 de Donniasantu, a is oras 17:00, cun Manrico Mascia e su líbburu suu “Il Ferro e la Salsedine" - Cenàbara su 15 de Donniasantu a is oras 17:00, cun Eleonora Medda e Gabriele Paparo cun su líbburu suu "HMS Safari" Aici is organizadoris chistionant de s’acontéssiu: "Totus e duas is presentadas si faint in su Montigranàticu, innui eus a passai su mari andendi de s’Adriaticu artu fintzas a su Mediterràneu e agoa tocai is climas fridus de is maris de su nord, po ndi torrai a abasciai a sud faci a is maris tropicalis, po cumprendi diaderus sa vida bívia in mari e nci acabbussai in s’istória longa e simpli, de cussas chi contànt is bècius chi ant fatu sa Gherra, e a bortas aici ispantosa chi iat a podi essi unu film. E po dda torrai a fraigai eus a truessai s’Europa, isprorendi is arrestus de is navis, arcivus, líbburus, registratzionis, ambasciadas, ministerus, museus. Immoi, cust’istória seus prontus a si dda contai. Lixerai su ponti! Acabbussamentu!»
12/11/2024
Biddacidru. “Visioni Sarde” e leturas po piciocheddus: Su Prémiu Dessì intrat in is iscolas de Biddacidru.
Noba pigada de su giassu: www.ilsardingtonpost.it In Biddacidru su Prémiu Dessì intrat in is iscolas, cun is projetzionis de “Visioni Sarde” e is líbburus po piciocus “Le 60 avventure da vivere nella natura” de Marco Priori e Alice Centioni e “Scintilla” de Nadia Terranova. Si aberrint is atóbius de su Prémiu Literàriu “Giuseppe Dessì” cun su mundu de s’iscola. Una série de atóbius chi portant sa rassínnia tzinematogràfica “Visioni Sarde” in is Iscolas Superioris de Biddacidru e sa literadura po pipius e piciocheddus in is Iscolas Elementaris e Médias. Visioni Sarde Duus is atóbius previdius: gióbia 14 de Donniasantu, h.10:00, in s’Istitutu Agràriu (sea istacada de su I.I.Buonarroti – Volta) e gióbia 28 de Donniasantu, h. 10:00, in su Litzeu Clàssicu – Linguísticu “Piga”. Istràngius de is duas projetzionis is cortometràgius de registas sardus gióvunus premiaus in cuncursus natzionalis: Michela Anedda e Daniele Arca chi si cunfrontat cun is discentis. Cun issus, su 14 de Donniasantu, in s’Istitutu Agràriu, ddoi est puru Enzo Cugusi, Diretori Artísticu de “Visioni Sarde”, e su 28 de Donniasantu, in su Litzeu “Piga” de Biddacidru, su Regista Tore Cubeddu. “Su tzínema – narat sa Presidente de sa “Fondazione Giuseppe Dessì”, Debora Aru, si podit agiudai a ligi sa realidadi innui biveus e a interpretai is percursus e is cambiamentus chi fait s’Ómini in is atividadis sotzialis e culturalis in sa Sardigna de s’edadi cuntemporànea. Eus iscioberau is cortometràgius de “Visioni Sarde”, ambientaus po su prus in Sardigna, ca proponint temas universalis cumenti a s’analisi de s’ànimu umanu de is gióvunus e de is mannus, is raportus intra de is generatzionis, s’amparu contras a is disastrus naturalis, sa guerra. Unu progetu chi interessat is gióvunus cumenti a istrùmbulu a sa cusciéntzia e a sa discussioni, cumenti a ocasioni de arraxonamentu e de cunfrontu a suba de argumentus prus che mai atualis in dí de oi”. Is òperas propostas a is discentis in is duus atóbius cirdesus de “Visioni Sarde” afrontant e contant s’atualidadi de medas puntus de vista, cun sa matessi eficàtzia e fortza espressiva, donendi bideas interessantis de cunfrontu e de arraxonamentu. Labai: “Giú cun giuali” de Michela Anedda. Duus fradilis medas diferentis intra de issus: unu est puliu e ordinau, s’àteru est brutu e isfaciu. Is duus, goghendi agatant sa manera po andai addia de is apariéntzias; “Ranas” de Daniele Arca, duus amigus afrontant unus cantu disafius chi ponint a sa prova su coràgiu insoru, sa bidea de vida e su raportu cun sa morti chi donniunu de issus tenit; “Tilipirche” de Francesco Piras, sa fortza e su coràgiu de s’ómini. Istória de una famíllia de allevadoris duranti s’invasioni de is pibitziris in su tzentru Sardigna. “Visioni Sarde” nascit in su 2014 in sa Tzineteca de Bologna a suba de una bidea de Bruno Mossa cun s’obbietivu de contai,po médiu de su tzínema, sa Sardigna in su mundu . Sa rasínnia in is annus si est imposta a s’atentzioni de su púbblicu, de is operadoris e de sa crítica po sa calidadi de is òperas iscioberadas, po s’atentzioni a suba de is fermentus nous e de totu su chi ànimat su tzínema sardu nou. Cun su tempus est bessida sémpiri prus importanti apoderendi sa vocatzioni a èssiri una vetrina po su tzínema de calidadi prodúsiu in Sardigna e a iscoberri gióvunus de talentu e ddis donai s’ocasioni de sodigai su púbblicu natzionali e internatzionali. Su progetu dd’at organizau sa Tzineteca de Bologna cun s’agiudu de “Sardegna Film Commission”. De s’ispartzinadura si ndi òcupat su “Circolo Giuseppe Dessì” de Vercelli gràtzias a is finantziamentus chi dd' at donau sa Regione Autònoma de Sardigna, Assessoradu de su Trabballu in su cuntestu de su programma annuali Disterru 2023 cunformas a sa L.R. 7 de su 15 de Gennaxu 1991 “Emigrazione”. Literadura po piciocus e piciocas Su Prémiu Literàriu “Giuseppe Dessì” portat autoris e líbburus in is iscolas de s’Istitutu Cumprensivu “Loru-Dessì”, cun sa punna de acumpangiai is discentis in unu camminu de cultura, natura e literadura. Su primu atóbiu est cun is discentis de s’Iscola Elementari, su 25 de Donniasantu, innui is autoris de “60 avventure da vivere nella natura” (Piemme) e protagonistas puru de su programma “Geo” de Rai3, Marco Priori e Alice Centioni, contant a is pipus sa bellesa e s’importàntzia de sa natura. Sighit, su 26 e su 27 de Donniasantu, s’atóbiu cun is discentis de is Iscolas Médias cun Nadia Terranova, bincidora de medas prémius, intra de custus su “Bagutta Opera Prima” e su prémiu americanu “ The Bridge Book Award” e finalista in su Prémiu “Strega” in su 2018, autora de “Scintilla” (Mondadori), cun custu acumpàngiat is piciocheddas e piciocheddus in unu biaxi interessanti in su mundu de sa natura. Sa de 39 Editzionis de su Prémiu Literàriu “Giuseppe Dessì” dd’at organizada e prummóvia sa “Fondazione Giuseppe Dessì”, cun su finantziamentu de s’Assessoradu Regionali de s’Istrutzioni Púbblica e Benis Culturalis de sa Regione Autònoma de Sardigna, de su comunu de Biddacidru e de sa “Fondazione di Sardegna”, cun su patrotzíniu de “Rai Sardegna” e sa “Media Partner” de Tgr, de su MIC (Ministeru de sa Cultura) e de su Gal Linas Campidanu.
12/11/2024
Biddacidru. Su “Caffè Letterario” faci a una gestioni noba. Aprovadas is linias de inditu po sa gestioni de su locali de recreu e culturali.
Noba pigada de su giassu: www.ilsardingtonpost.it Sa cuntzessioni comunali po sa gestioni de su Cafè Literàriu de Biddacidru est giai po iscadiri e s'Amministratzioni Comunali at preparau is Línias de inditu po s'intregadura noba, po chì su fàbricu sigat a arrapresentai po sa comunidadi unu tzentru de sotzialidadi e de biatzesa culturali. Su Cafè Literàriu de propiedadi de su Comunu, acumpriu infatu a is trabballus de ammodernamentu de sa domu de s'Otuxentus de is Cogotis, in Pratza Zampillo, in su coru de su tzentru istóricu de Biddacidru, in is primus annus de vida at tentu calincuna dificultadi a intrai in atividadi: is garas púbblicas fatas in su 2010 e in su 2013 no iant biu nisciuna partitzipatzioni. Iscéti s'annu a pustis, in su 2014, po mori de cunditzionis prus cunvenientis, sa gara iat tentu un'arresurtau positivu e in su 2015 iant fatu s'autu de cuntzessioni cun is gestoris atualis, sa sotziedadi "Versi d'Autore". Is línias de inditu, delibberadas de sa Giunta cirdesa cida passada, funt de ghia a is Servítzius comunalis chi faint su bandu de gara po sa cuntzessioni noba chi durat 9 annus. Po su prus arrispetendi sa formula atuali, afortiendi de prus is aspetus chi donant a su locali su rolu ativu de proposta culturali e de prummotzioni turística. Su Cafè Literàriu, istabbilint is inditus de sa Giunta, depit sighiri a èssiri unu puntu de atóbiu biu e acatosu, chi in prus de s'atividadi de cafeteria e de tzilleri, in su matessi tempus depit proponni acontéssius culturalis cumenti a presentadas de líbburus, seradas musicalis e ammostas. Is gestoris de su locali depint organizai a su mancu 6 acontéssius a s'annu e donai sa disponíbbilidadi po acontéssius propostus de àterus. Is progetus chi si càndidant a sa gestioni de su locali, in prus, depint previdiri un'avaloramentu multifuntzionali de su logu chi interessit puru atividadis turísticas e cummertzialis, chi punnant a sa prummotzioni de is primoris produtivus cirdesus. Si est donau un'atentu particulari a s'oràriu de abertura de su locali: depit abarrai abertu a su púbblicu a su mancu 6 dís a suba de 7, cun un'oràriu mínimu de abertura de 16 oras a sa dí, de abrili a meseladàmini e 12 oras de donniasantu a martzu, garantendi una preséntzia costanti e sighida, prus che totu candu ddoi at atóbius culturalis, isportivus e gastronómicus de importu chi atirant in Biddacidru medas abbisitadoris. Su gestori nou ddu iscioberant po médiu de una gara púbblica, cunformas a s'oferta económica prus vantagiosa. A càrrigu de su gestori funt is ispesas de manutentzioni ordinària, luxi e àcua. Po su puntégiu de donai a is partitzipantis, si donat grandu importu a sa calidadi de su progetu culturali propostu, diaici cumenti a s'esperiéntzia in sa gestioni de cafeterias o símbilis. In s'interis de s'annu tocat a garantiri a su Comunu su diritu de umperai a indonu is logus de totu su fàbbricu po dexi acontéssius púbblicus ( dibbàtidus, atóbius culturalis, ammostas, e aici sighendi). Sa Giunta po apoderai su caràteri istóricu e culturali de su locali at detzídiu de ponni in craru, in is línias de inditu, sa dennega de ponni e de umperai "slot machine" e totus is aparechiaduras po su giogu de azardu.
10/11/2024
Sàrdara. Sa Crèsia de sa Beata Vergine Assunta.
Noba pigada in su giassu internet “Idese”. Sa Crèsia est posta in artu, in una positzioni dominadora, chi pigaus in cunsideru su centru abitau. Una scalera ponit in comunicatzioni sa pratza de sa crèsia cun s’ àtera pratza chi nc’ est a innantis e innui s’agatat su Museu Archeológicu Villa Abbas. Is primas fontis documentàrias eclesiàsticas chi fueddant de sa Crèsia apillant a su 1524. In cussus documetus chi pertocant sa visita pastorali de su s’ Obispu de Terraba funt allistaus e descritus is trastus de aintru. Mancari ammanchint datus certus, is documentus eclesiàsticus impari a s’ impostatzioni tradu-gótica de su fàbbricu, faint apillai sa pesadura a s’ acabbu de su Cuatruxentus. Sa faciada est serrada de pilastrus e cumpletada de timpanus a arcu a dòpia inflessioni; a sa dereta nc’est su campanibi a canna cuadrada realitzau in su Seixentus. Is formas severas e simplis de su fàbbricu s’ ammàniant in una navada centrali innui nci funt campadas cun arcus a sestu acutu, e a làcana nci funt is navadas lateralis nàscias pustis de ai mudau is capellas, cun interventus fatus in èpocas fatantis. Sa Crèsia arreguat s’ altari mannu in marmuru polícromu, chi apillat a is annus 1782-1784 e is sculturas de s’ “Estofado de oro” de is Santus apóstulus Bartolomeo, Pietro e Paolo, de su tempus romanu sa prima e napuletanas is segundas, si podint datai a su de XVII sèculus.
08/11/2024
Santu 'Èngiu. 9 e 10 de Donniasantu “Festival delle Strade dello Zafferano”
Noba pigada de su giassu: www.lagazzettadelmediocampidano.it Santu 'Èngiu istràngiat su "Festival dello Zafferano di Sardegna DOP" duas dís dedicadas a sa traditzioni e a is saboris auténticus de sa Sardigna. Sàbudu 9 e domínigu 10 de Donniasantu, Santu 'Èngiu arritzit sa de duas tapas de su "Festival Strade dello Zafferano di Sardegna DOP", chi aunit is Comunus de Santu 'Èngiu, Turri e Biddanoa Franca, agiudau de sa "Fondazione di Sardegna" e de s'Assessoradu a sa Cultura de sa Regione Autònoma de Sardigna, cun su cordinamentu de "Associazione Enti Locali". A pustis de s'acunsentimentu de púbblicu de sa primu dí de festival chi s' est fata in Biddanoa Franca domínigu 3 de Donniasantu, sa rassínnia turísticu-gastronómica dedicada a s'òru arrúbiu de Sardigna fait tapa in Santu 'Èngiu. In su coru de su Campidanu, intra de mari e coddus de sa Marmilla, si produsint dónnia annu, prus o mancu, 350 chilus de istàmini de tzafanau, a suba de unu totali de 450 chilus in totu Itàlia. Cun prus de 45 ètarus coltivaus, sa Sardigna tenit su primatu natzionali po sa produsidura de su "Crocus sativus", e in su Campidanu de Mesu si cuntzentrat su 86% de su tzafanau sardu, paris a su 66% de sa produsidura natzionali. Is Comunus de Santu 'Èngiu, Turri e Biddanoa Franca funt su tzentru de custa coltivatzioni pretziosa, chi arrapresentat unu valori económicu, sotziali e culturali de fundamentu po is comunidadis in is "Strade dello zafferano di Sardegna DOP". "Su tzafanau de Santu 'Èngiu – narat Riccardo Pinna, Assessori a sa Cultura, Ispetàculu, Prummotzioni de sa Tzitadi e Turismu de su Comunu de Santu 'Èngiu – arrapresentat po sa Sardigna su chi su "champagne" est po sa Frància o su tartufu po su Piemonti: unu primori únicu in su mundu. Custu "òru arrúbiu" tocat a ddu cuntziderai po su chi est: una prenda chi merescit de bessiri de is dinàmicas cummertzialis localis chi ndi límitant s'ispartzinadura e puntai faci a is mercaus internatzionalis, innui podit espressai totu su valori suu e portai benèssiri a is comunidadis chi ddu produsint. Sa bisioni cosa nosta de su benidori est crara: costruiri a ingíriu de su tzafanau unu "storytelling" chi ndi agiudit sa cummertzializatzioni e fai nasci un'economia forti e de profetu, chi iscípiat donai linfa noba a s'identidadi de su territóriu, avalorendi·ndi traditzionis e isciri. Su "Festival Strade dello Zafferano di Sardegna DOP" est un'ocasioni importanti po cumpartziri cun su mundu cust'arrichesa e costruiri un'arretza de agiudu intra de produtoris, istitutzionis e tzitadinus po sa créscida e sa prummotzioni de unu prodotu chi est orgólliu de sa terra cosa nosta". SÀBUDU 9 DE DONNIASANTU – IN ANTIS DE SU FESTIVAL Sa dí de sàbudu incumentzat cun su giru de is murales de Santu 'Èngiu. Su movimentu artísticu locali, nàsciu pagu prus de dex'annus a oi, at portau sa bidda in is cartinas de su turismu internatzionali, atirendi abbisitadoris a totu s'annu po ammirai is medas òperas de Street Art. In s'interis de su festival si podit partitzipai a is girus ghiaus e iscoberri is segretus e is bellesas de custu museu a celu abertu. "Su Festival de ocannu est prus che mai un'ocasioni po iscoberri non iscéti is saboris auténticus de su tzafanau, ma puru is istórias e is traditzionis chi faint única sa bidda de Santu 'Èngiu – sighit Pinna – Po s'editzioni de su 2024 eus iscioberau de arricai su programma cun atividadis chi aunint s'arti e sa cultura de su territóriu cosa nosta. Custa editzioni bolit aberri is gennas a is chini circant autentzidadi e ispantu, intra de traditzionis antigas e formas nobas de espressioni artística. Cun acontéssius chi andant de su "showcooking" a su baddu sardu, de is formas nobas de espressioni artísticas, fintzas a tocai su "bookcrossing", sa literadura e s'isport. Sàbudu 9 e domínigu 10 de Donniasantu sa comunidadi cosa nosta afestat s'òru arrúbiu pretziosu in dónnia aspetu, ammostendi cumenti su tzafanau podit èssiri s'ànima de unu progetu chi ponit in pari su passau cun su presenti po castiai a su benidori". In Domu Mereu, intamis, ddoi at una série de labboratórius artigianalis a incuru de su Cunsórtziu turísticu "L'Altra Cultura". Is partitzipantis podint imparai a fai su saboni naturali e iscoberri cumentu su tzafanau, protagonista de su festival, podit èssiri umperau puru in is curas de bellesa traditzionalis sardas. Is espertus ammostant is virtudis de su tzafanau in sa mexina populari sarda, un'arti antiga chi passat de generatzioni in generatzioni. A merí, Domu Mereu bessit unu puntu de atóbiu po is amantiosus de sa letura cun unu banghixeddu de "bookcrossing" chi at organizau su "Festival Letterario del Monreale", innui si nci podit cuncàmbiai líbburus in un'ària informali e culturali. Sémpiri a merí, su Museu Etnogràficu "Sa Moba Sarda", in sa "Domu Museu Dona Màxima", aberit is gennas po un'ammosta ispetziali de fotografias istóricas de s'Assótziu, donendi una mirada noba a suba de sa vida e is traditzionis de sa bidda. Cultura, cosa de papai a voluntadi ma puru isport. In is campus de tennis de bia Dante si fait sa primu editzioni de sa "Zafferano Cup", unu torneu de tennis chi at organizau su "Tennis Club Monreale 1995", chi bit sa partitzipatzioni de amantiosus de su territóriu. Sa dí acabbat cun unu atóbiu chi organizat LAORE in s'Àula de su Cuntzillu de su Comunu, intitulau "Zafferano: una risorsa speziale tra passato, presente e futuro", unu dibàtidu intra de espertus e produtoris a suba de su valori culturali, sotziali e económicu de su tzafanau in Sardigna. DOMÍNIGU 10 DE DONNIASANTU Domínigu est sa grandu dí de su Tzafanau Santuingesu. Is afestus po su tzafanau incumentzant su mengianu cun is abbisitas ghiadas in is localidadis "S'Ibba Manna, Il Giardino di Levante, in s'istrada provintziali chi collegat Sàrdara e Santu 'Èngiu e cun una bessida in "mountain bike" chi at organizau sa "Monreal bike", e chi portat is cicrístas a abbisitai is campus de tzafanau chi ingíriant sa bidda. Unu percursu de 30 Km. chi acabbat cun una firmada in Sàrdara po si pasiai in antis de torrai. h. 09:00 su tzentru de Santu 'Èngiu arritzit is primus turístas e abbisitadoris bessendi unu mercau mannu a s'ària aberta, innui is produtoris, artesanus, artistas localis e assótzius de su territóriu ànimant is bias de sa bidda cun bancarellas de tzafanau DOP, prodotus sardus, artesania e un'ammosta de màchinas d'època a incuru de su "Club delle 500" de Santu 'Èngiu. In s'istatzioni de is trenus de Santu 'Èngiu, h. 09:00, sa Banda Musicali arritzit su Trenu de su Tzafanau, unu trenu ispetziali chi lompit de Casteddu. In s'interis de sa dí is abbisitadoris podint partitzipai a labboratórius in Domu Ennas, innui su Comitau "Coxina Antiga" imparat is partitzipantis a pulì su tzafanau, proponendi un'esperiéntzia auténtica de is técnicas traditzionalis. Po chini disígiat connosci ancora mellus s'istória de sa bidda, in Sa Domu Museu Dona Màxima, si podit abbisitai un'ammosta fotogràfica e biri cumenti si trabballat su frori de su tzafanau. In su coru de su tzentru istóricu, intra de bia Santa Croce e Pratza Marconi, su Mercau Tzívicu, su CIVIS e Domu Mereu ofrint un'iscioberu de tzafanau DOP e de àterus prodotus localis, intamis in su bixinau de Aristanis (bia Eleonora), intra de arti e cosa de papai bona, si podint ammirai is òperas de s'artista santuingesu Sergio Putzu, curiosendi intra de pratzas abertas, logus po papai e logus dedicaus a sa tastadura de unus cantu mellus binus de su territóriu. Pagu atesu, in sa sea C'Entro, ddoi est s'ammosta "Ri-Tratti" de s'artista Giorgio Concu, e sémpiri de innòi partint is girus po s'abbisita a is muralis santuingesus. Is ispetàculus e is animatzionis funt una costanti de totu sa dí: sa "SeuinStreet Band" allirgat is bias de Santu 'Éngiu cun is nodas "funk, soul, R&B e Jazz" " cosa sua, intamis su merí a acabbu de sa giornada in Pratza Marconi nc'est su baddu sardu a incuru de sa Pro Loco e de s'assótziu "Fainas Antigas", e sa música traditzionali de "Su Sonadori", Roberto Fadda. In pratza Marconi ddoi est su "showcooking" a incuru de Matteo Siddi e ancora su "truccabimbi" de Marta Siddi chi tenint cumpangia a is presentis fintzas a s'ora de prandi cun su pràngiu traditzionali de su tzafanau chi at organizau sa Pro Loco. Su merí, sémpiri in Pratza Marconi, ddoi est su cuncursu gastronómicu "Il Secondo allo Zafferano" presentau de Gianluca Meda. Sa serada acabbat cun música e baddus traditzionalis, unu momentu de festa e tzelebbratzioni de is arréxinis culturalis de Santu 'Èngiu.
07/11/2024
Biddacidru. Sa de 11 Editzionis de sa Rassínnia Teatrali “Città di Villacidro” - Teatru “Don Bosco”, bia Asproni Biddacidru. De su 10 de Donniasantu a su 1 de Meseidas 2024
Sa Cumpangia teatrali "Sa Spendula" de Biddacidru, in collabboratzioni cun sa Parróchia de Santa Barbara e su Patrotzíniu de su Comunu de Biddacidru, presentat sa de 11 Editzionis de sa Rassínnia Teatrali "Città di Villacidro". Cuatru atóbius de no perdi cunformas a sa traditzioni e a s'ispàssiu innui si podint apretziai is arrapresentatzionis de is Cumpangias "Filodrammatica Lasalliana" de pauli, "Special company" de Sestu, "Muredda" de santu 'Èngiu e de sa cumpangia teatrali chi organizat "Sa Spendula" de Biddacidru. Su primu atóbiu su 10 de Donniasantu 2024, h. 18:00, in su Teatru "Don Bosco" de Biddacidru po sa presentada de sa Rassínnia e po sa primu arrapresentatzioni "Is tres testamentus"a incuru de sa "Filodrammatica Lasalliana". Informatzionis e piessignus in sa locandina.
07/11/2024
Santu 'Èngiu. S'assótziu Sa Moba Sarda fait 30 annus.
Noba pigada de su giassu: www.sangavinomonreale.net Santu 'Èngiu si preparat a afestai una tapa importanti in s'istória de s'assotziatzionismu locali: is trint'annus de s'assótziu Sa Moba Sarda. Fundada in su 1994, s'assótziu bessit unu puntu de arrelatu po sa prummotzioni de sa cultura e de is traditzionis localis. Po afestai custu traguardu, su 8 de Donniasantu 2024, h. 17:00, in sa Domu Museu Dona Màxima, in bia Amsicora 21, ddoi at un'acontéssiu ispetziali abertu a totus is tzitadinus. S'atóbiu donat s'ocasioni única po torrai a bivi in pari is momentus prus importantis de s'Assótziu, gràtzias a testimóngius diretus de is sótzius fundadoris e de is collabboradoris, in prus de unu percursu fatu de imàginis, videus e iscritus chi contant s'istória de Sa Moba sarda. A arricai s'acontéssiu, is leturas chi interpretant is atoris e is atoras de s'assótziu "Come.Te", chi proponint leturas e contus acapiaus a sa vida e a is atividadis de Sa Moba Sarda. Sa serada arrapresentat no iscéti unu momentu de arrexonamentu a suba de su passau, ma s'ocasioni puru po si torrai a agatai, cumpartziri arregordus e afortiai is ligàminis cun sa Comunidadi. Po serrai is afestus, ddoi at unu cumbidu, po brindai in pari a is acunsentimentus sodigaus e a is disafius nous chi abetant s'assótziu. Su cumbidu est abertu a totus: sótzius, finantziadoris, collabboradoris e tzitadinus, po fai un'omenàgiu a un'assótziu chi de trint'annus si dédicat cun passioni a s'avaloramentu de sa cultura e de is traditzionis santuingesas.
07/11/2024
MarmilLibri 2024: su festival literàriu ispartzinau chi tzelebrat cultura, natura e traditzionis de sa Marmilla.
Noba pigada de su giassu: www.sangavinomonreale.net Sa de duas Editzionis de su Festival "MarmilLibri", un'atóbiu literàriu únicu in su coru de sa Marmilla, si preparat a arritziri residentis e abbisitadoris in una série de atóbius intra de cultura, traditzionis e saboris localis. Su Festival, prummóviu de s'Unioni de is Comunus de sa Marmilla cun s'agiudu de sa Regione Autònoma de Sardigna, Assessoradu Istrutzioni Púbblica, Benis Culturalis, Ispetàculu e Isport, in collabboratzioni cun sa "Fondazione Altopiano della Giara" e sa "Fondazione Villanovafranca" e realizau cun su cordinamentu organizativu de "Associazione Enti Locali per le Attività Culturali e di Spettacolo" si fait de su 7 de Donniasantu a su 14 de Meseidas cun tapas in is 18 Comunus chi cumponint s'Unioni de is Comunus de sa Marmilla. "MarmilLibri – narat su Síndigu de Tuili e Presidenti de s'Unioni de is Comunus de sa Marmilla Andrea Locci – est un'acontéssiu chi arrapresentat siat unu disafiu chi una vetrina culturali importanti po su territóriu cosa nosta, nci credeus meda e po custu si seus impenniaus po ndi garantiri s'acunsentimentu. Seus satisfaus meda de su trabballu fatu e de sa collabboratzioni chi su territóriu est ammostendi. Cumbidaus, duncas, totus a partitzipai a custu acontéssiu culturali de grandu importu chi si interessat cumenti mai prima de immui". Unu programma arricu e vàriu Su festival MarmilLibri 2024 bit sa partitzipatzioni de medas autoris e presentat un'iscioberu de òperas chi andant de sa narrativa a sa sagística, ofrendi una panoràmica a suba de is boxis nobas e afirmads de sa literadura italiana. "Unu festival cumenti a MarmilLibri – narat Giovanni Follesa, Diretori Artísticu de su progetu MarmilLibri – ispartzinau in su territóriu arrapresentat un'ocasioni de atóbiu e de créscida importanti po totus is Comunudadis partitzipantis. S'iscioberu est istétiu su de portai in donniuna de is 18 biddas un'autori o un'autora acapiau o acapiada a sa Sardigna. A custas atividadis si acungint is "reading " literàrius de autoris natzionalis e internatzionalis a suba de un'argumentu comunu: s'ambienti e sa sustenibbilidadi. S'obbietivu est sensibbilizai a suba de unu disafiu chi si interessat a totus, sa de sa rivolutzioni culturali e de s'educatzioni ambientali, e totus depeus donai un'agiudu ativu". MarmilLibri 2024: un'únicu festival, 18 Comunus, 36 acontéssius diferentis. Su festival MarmilLibri 2024 est una proposta literària chi atruessat sa Marmilla, interessendi adderetura 18 Comunus in una série de atóbius de no perdi cun autoris e leturas. Dónnia dí ofrit un'ammesturu de presentadas de líbburus, "reading" a tema e sa possibbilidadi de iscoberri is dislindads de dónnia logu po médiu de s'acatu de sa comunidadi locali e po médiu de tastaduras. Si incumentzat su 7 de Donniasantu in Barùmini cun Cristina Caboni e su líbburu suu "La ragazza senza radici" (Garzanti), sighiu de su "reading" "Prendetevi la luna" de Paolo Crepet, cun sa presentada a incuru de Giuliano Pornasio in sa Bibblioteca. 8 de Donniasantu, in Mara Arbarei, si incumentzat cun su "reading" "Signor Salsiccia" cun Flavio Soriga e Renzo Cugis, a sighiri Stefano Obino presentat "Bartolomeo Salazar: il silenzio della peste" (Camera edizioni). 9 de Donniasantu, in Siddi, Giulio Concu isprorat is mistérius de is Domus de Janas (Imago edizioni) e si sighit cun su "Reading" "La forza gentile degli alberi" de Peter Wohlleben. 14 de Donniasantu, in Biddanoa de Forru, est su turnu de Vincenzo Soddu cun "A cantar d'amore" (Imago edizioni) e si sighit cun su "reading" "Viaggio a Oblivia" de Alex Bellini. 15 de Donniasantu, in Giauni, Melania Muscas presentat "La profezia dello straniero. Sherden" (Piemme) e si sighit cun su "Reading" "La maledizione della noce moscata" de Amitav Ghosh. 16 de Donniasantu, in Futei, Vanessa Roggeri presentat "Il ladro di scarabei" (Rizzoli), sighit "Breve storia della terra (con noi dentro)" de Juan Luis e Milagros Algaba. 21 de Donniasantu, in Lunamatrona, Elisa Pilia presentat "La bambina del vetro" (Il Maestrale) cun su "reading" "Da solo nelle terre selvagge" de Richard Proenneke e Sam Keith. 22 de Donniasantu, in Seddori, Matteo Floris presentat su líbburu suu "Vendetta nella nebbia" (Camena edizioni), e si sighit cun su "reading" "Insieme per salvare il pianeta" de Dalai Lama e Greta Thumberg. 28 de Donniasantu, in Pauli Arbarei, Gianni Usai presentat "Il peggiore" (Il Maestrale), sighit su "reading" "Primavera silenziosa" de Rachel Carson. 29 de Donniasantu, in Setzu, Paola Musa presentat "La vita in più di Marta S." (Arkadia), sighit su "reading" de sa dí "La foresta di perle" de Franco Berrino e Enrica Bortolazzi. 30 de Donniasantu, in Biddanoa Franca, Giorgio La Spisa isterrit ""L'imprevedibile accade" ( Arkadia), sighit su "reading" "Se pianto un albero posso mangiare una bistecca?" de Giacomo Mauretto. 5 de Meseidas, in Segariu, Ilario Carta fueddat de su líbburu suu "Japanischer Garten" (Arkadia), cun su "reading" "Meravigliose creature" de Stefano Mazzotti. 6 de Meseidas, in Is Pratzas, Ada Lai presentat "La trilogia delle grandi signore" (Edizioni della Torre) sighiu de su "reading" "Possiamo salvare il mondo prima di cena" de Jonathan Safran Foer. 7 de Meseidas, in Ussaramanna, Daniele Congiu cumpartzit "Erano gli anni" (Arkadia) sighiu de "Racconti del pianeta terra" de Niccolò Scaffai. 11 de Meseidas, in Gesturi, Rossana Copez presentat "Adelasia, judikissa di Torres – Benedetta, Judikissa de Calari" (Janus editore), a sighiri su "reading" "La maledizione della noce moscata" de Aitav Ghosh. 12 de Meseidas, in Tuili, Ilenia Loddo presentat "Le terrificanti scoperte del Dottor Kraus – Le Panas" (Camena edizioni), sighit su "reading" "White Light" (Camena 2022). 13 de Meseidas, in Turri, Nicolò Migheli presentat "Il cavaliere senza onore" (Arkadia), sighiu de su "reading" "Saggio erotico sulla fine del mondo" de Barbascura X. 14 de Meseidas, in Forru, Daniela Tagliafico serrat su festival cun "Re Giorgio – dietro le quinte di una Presidenza" (Rai Libri), sighit su "reading" "Fitopolis, la città vivente" de Stefano Mancuso in s'Ammassu de su Trigu (Montegranatico). Sa Marmilla, unu líbburu de istória, arti e traditzionis de ligi totu in una borta. De su Parcu de San Platanu de Barùmini a sa Bibblioteca de Mara Arbarei, de su Museu Archeológicu "Su Mulinu" de Biddanoa Franca a sa Domu Marica de Gesturi, dónnia logu donat sa possibbilidadi po isprorai no iscéti is cuntenutus literàrius ma puru s'istória e sa bellesa de is paesàgius de sa Marmilla. In prus, is camminus urbanus e is abbisitas ghiadas, organizaus in collabboratzioni cun is Istitutzionis localis, permitint a is partitzipantis de iscoberri su patrimóniu archeológicu, culturali e naturali immensu de su territóriu, cun tapas de importu cumenti a sa de su retàulu de su Maistu de Calteddu e su Museo degli Strumenti Musicali" in Tuili. Intra de is propostas de importu si sinnalant is abbisitas ghiadas a is burgus istóricus, su camminu urbanu in Biddanoa Franca cun abbisita a s'Altari nuràgicu ancora sanu, chi si podit datai a sa primu Edadi de su ferru, e su Museu eciseri "Museo Filo di Memoria" in Setzu, acapiau a is Domus de Janas "Sa Domu 'e s'Orcu". Custus camminus donant sa possibbilidadi a is abbisitadoris de si nci atzuvai de unu totu in is traditzionis localis e in s'istória de is logus. Is acontéssius "Alla scoperta della Marmilla" chi at organizau sa "Fondazione Villanovafranca" e sa "Fondazione Altopiano della Giara" donant s'oportunidadi única de isprorai su territóriu po médiu de camminus istóricus, culturalis e naturalísticus. Su 29 de Donniasantu, in Setzu, si partit cun unu camminu urbanu chi ponit in luxi is bellesas de su tzentru ma cun un'abbisita puru a su "Museo Filo di Memoria", acapiau a istrintu a sa Domus de Janas " Sa Domu 'e s'Orcu, chi arrapresentat s'acàpiu intra de su patrimóniu culturali e archeológicu de sa zona. Su 30 de Donniasantu, Biddanoa Franca cumbidat a is partitzipantis a una camminada peri su tzentru istóricu, chi acabbat cun s'abbisita a su Museu Archeológicu "Su Mulinu". Su 11 de Meseidas, Gesturi proponit unu camminu urbanu chi torrat onenàgiu a sa figura de su Biadu Fra' Nicola de Gesturi, isprorendi is logus chi ant sinnau su camminu ispirituali cosa sua. Serrat sa série de acontéssius Tuili, su 12 de Meseidas, cun unu giru in su tzentru istóricu chi incluit s'abbisita a su retàulu de su Maistu de Calteddu in sa Villa Asquer, a su "Museo degli Strumenti Musicali Sardi" e a su Museo dell'Olio e dell'Olivo".
07/11/2024
Mara Arbarei. “MarmilLibri 2024”: su Fèstival chi ingollit sa literadura in su coru de sa Marmidda!
18 comunus impari donant vida a sa segundu editzioni de “MarmilLibri, su fèstival literàriu de sa Marmidda” chi permitit de scoberri s’identidadi de sa Marmidda. De su sàgiu a su romanzu, passendi po fumetus, mùsica e ambienti. 18 atòbius cun autoris nodius, cumbidus cun prodotus localis po un’esperièntzia sentzilla! Unu viàgiu intre traditzionis, cultura e natura curada de is Fondatzionis “Villanovafranca” e “Altopiano della Giara” cun bìsitas ghiadas, passilladas e itineràrius urbanus po scoberri sa bellesa de su paesàgiu e sa stòria arrica de sa terra nosta. Castiadì su programma intrenu in marmillibri.it
07/11/2024
Mara Arbarei. Fèstival Literàriu Marmillibri 2024 – Mara Arbarei
Cenàbara 8 de onniasantu 2024 – Biblioteca Comunali Programma: a is 17:30 – Arrogus de “Signor Salsiccia” de e cun Flavio Soriga e Renzo Cugis Un’esperièntzia de bivi, unu fueddu infatu de s’atru, ghiaus de sa boxi de s’autori Flavio Soriga impari a Renzo Cugis. Ligendi ligendi si fadeus pigai de sa stòria de Nora, una sarda giòvuna chi de Tatari si nd’andat a bivi a Uta, tzentru de su sud Sardigna. Po issa, s’agatai in unu logu nou no est fàcili: una domu cun una tziminera chi non funtzionat beni, unu giardinu abbandonau e una scola noa de isprorai. In su birdi de su giardinu, perou, unu atòbiu de spantu: unu fillixeddu de arritzoni apretau, annomingiau “Signor Salsiccia” (Sennori Sartitzu). Sa famìllia de Nora si ndi pigat cura, acapiendi sa vida sua a sa de s’animali. Unu contu de crèscia, emotzionis e scobertas, innui ònnia pàgina potat a pentzai ita bolat nai a si fai mannus. A is 18:30 – Presentada de su lìburu “Bartolomeo Salazar, il silenzio della peste” de Stefano Obino Su contu si potat a su tempus de sa timoria e de su cuntàgiu. Sighi Bartolomeo Salazar, unu protagonista curiosu e tribulliau, in s’interis chi parat faci a is segretus prus scuriosus de sa stòria. Editzioni de “Camena”, una ligidura forti meda.
07/11/2024
Sàrdara. “Opera Nazionale Balilla”.
Noba pigada de su giassu internet “Idese”. Su fàbbricu “Opera Nazionale Balilla” connotu puru cun s’ acrónimu “O.N.B”. Est unu modellu de architetura de sa scola razionalista de su tempus fascista. Su progetu e sa diretzioni de is trabballus podint essi de s’architetu Salvatore Rattu, chi in cussu tempus fiat unu de is architetus prus de importu in Sardigna. S’ architetu Rattu arricit s’ incàrrigu de su Comunu de Sàrdara in su 1936 e dd’ accabbat in su 1938; pesat po su matessi Comunu fintzas su mercau, sa caserma e aderetzat sa pratza. Su fàbbricu, chi est abarrau cumenti fiat, est partziu in tre partis: unu corpus centrali mannu innui nci fiat sa palestra, unu volumi laterali cun ddus aposentus cun destinatzioni amministrativa e culturali, e pois unu corpus a turri chi acapiat totus is partis
05/11/2024
Seddori. Festa de Santu Martinu.
Su Comitau de Santu Martinu, cun su contribbutu de su Comunu de Seddori e su patrocíniu de sa Citadi de Seddori, cuncordat sa de 44 editzionis de is afestus in onori de Santu Martinu. Nc’est fintzas sa Sagra de sa Faa e de is prodotus de sa gastronomia locali. Programma: - Su 6, 7, 8 de Donniasantu 2024: Triduo in preparatzioni. A is oras 16:30 Santa Missa (Crèsia de Santu Martinu) - Sàbudu su 9 de Donniasantu 2024: A is oras 10 abertura de is stand. Incarreru de sa Sagra cun sa bèndida de is drucis, de su binu e de is bìbitas. Is drucis ddus faint is fèmminas de su Comitau de Santu Martinu arrespetendi sa traditzioni de is drucis tìpicus de Seddori. A is oras 12:00 bèndida de sa faa coxinada segundu sa traditzioni seddoresa e bèndida de is Malloreddus a sa campidanesa e de su sartitzu arrustu. A is oras 19:30 beneditzioni e alluidura de su “Fogadoni de Santu Matì” A is oras 21:00 serada musicali cun su cumplessu “Rock pop band – Sanluri in Rock”. - Domínigu su 10 de Donniasantu 2024: A is oras 09:00 Santa Missa (Crèsia de Santu Larentu). A is oras 10:00 partèntzia de sa Pedalada po Stàini. A is oras 10:00 aberrit torra sa Sagra. Bèndida de sa faa, de is malloreddus e de is drucis. A is oras 16:30 prucessioni de su Santu partendi de sa Crèsia de Santu Martinu, acumpangiada de sa Banda Musicali A. Ponchielli dirìgia de su Maistu Paolo Argiolas, de su Grupu Polifónicu Folklorìsticu de Seddori, de is Cunfrarias e de is Grupus de Pregadoria e de is Launeddas cun s’itineràriu chi sighit: bia San Martino, via Bologna, viali Trieste, bia Sassari, bia Carlo Felice, bia A. Riva Villasanta, bia San Lorenzo, crèsia de Santu Larentu innui si cèlebrat sa Santa Missa presídia de Don Emanuele Meconcelli. A sighidura sa stàtua at a rientrai in sa Crèsia de Santu Martinu cun s’ itineràriu chi sighit: bia San Lorenzo, bia A. Riva Villasanta, bia Carlo Felice, bia Garibaldi, pratza Porta Nuova, bia San Martino po acabbai in sa Crèsia de Santu Martinu innui su Santu at a essi acólliu de is guetus. A is oras 20:30 serada musicali cun su grupu “Dilliriana”.
05/11/2024
Seddori. “Milite Ignoto”.
Su monumentu de su “Milite Ignoto” chi nc’est in Pratza Porta Nuova (chi a innantis fiat in Pratza Santu Perdu) ocannu fait 100 annus. E ingunis su 4 de Donniasantu 2024 ant fatu sa cerimónia in ocasioni de sa “Giornata dell’unità nazionale e delle forze armate”. S’ atóbiu fiat in Pratza Santu Larentu impari a is autoridadis civilis, militaris e religiosas, assótzius e studiantis. Don Mariano Matzeu at celebrau sa missa. In Pratza Porta Nuova ant fatu s’ Artzabandera acumpangiada de s’ Innu d’ Italia, cun is saludus de su Síndigu Alberto Urpi. Onori a sa bandera. Ligidura de su Bulletinu de sa Vitòria. Arregordu in memòria de is medagliaus de Seddori (a incuru de Gianni Mereu). Ponidura de sa Corona a su moumentu dedicau a su Milite Ignoto. Ponidura de sa Corona a su moumentu dedicau a su Milite Ignoto in Stàini.
01/10/2024
Mara Arbarei. Dì po is fortzas armadas
Arregodu de is motus in gherra. S’amministratzioni comunali de Mara Arbarei fait sciri ca sàbudu 9 de su mesi de onniasantu 2024 ddoi est sa tzerimònia po arregodai sa Dì de s’Unidadi Natzionali e de is Fortzas Armadas e is motus in gherra. Su programma est: a ora de is 09:45 – Atòbiu in Pratza de Corti a is 10:00 – Missa in Parròchia a is 11:00 – Si andat totus impari de Pratza de Corti a su Monumentu de is Motus in Gherra (Pratza de su Munitzìpiu bèciu) Sighit sa tzerimònia cun is autoridadis tzivilis, militaris e religiosas, is assòtzius e is scolas, fintzas a arrimai sa corona in su Monumentu. Est agradèssia sa partetzipatzioni de totu sa popolatzioni!
30/10/2024
Biddanoa de Forru. Sa de 11 Editzionis de “Su Piriciò”
Sàbudu su 16 de Donniasantu 2024 de is 7 de a merí (h. 19:00) torrat s’arressigna de "Su Piriciò", lómpia a sa de 11 editzionis suas. Gara e tastadura in Pratza Costitutzioni e a sighiri estraidura de sa loteria. Su Piriciolu est unu de is símbulus de sa poboresa chi at caraterizau sa cultura contadina, ma podit essi puru interpretau cumenti a símbulu antigu de angaria, giai chi fiat su binu chi is meris donànt a is serbidoris, poita si creiant chi issus no fiant merescidoris de bufai binu fatu de àxina scéti. Sa festa de su piriciolu nascit de un’idea de sa Cunfraria Don Piriciolu chi tenit sa volontadi de torrai a bogai a pillu is traditzionis e is printzípius de sa traditzioni de is messajus e prommovi s’unicidadi e sa sintzillesa de is produtus alimentaris sardus.
30/10/2024
Biddanoa de Forru. “Bandidos e Balentes – Sardegna in chiaroscuro”
S’incingiadura de s’ammosta personali de Lorenzo Cuccuru, intitulada "Bandidos e Balentes - Sardegna in chiaroscuro", si fait s’8 de Donniasantu a is 5 e mesu de a merí (h. 17:30) in sa Sala de is Ammostas temporàneas de su Museu Archeológicu Genna Maria. S’acontéssiu permitit de aciuvai in s’arti e in sa cultura de sa Sardigna, gràtzias a tàulas illustradas e óperas pitóricas de s’artista. Cuccuru est connotu po su lióngiu chi tenit cun sa Sardigna, una terra chi isprorat e arrapresentat cun idealis fungudus impreendi a turnu luxi e umbra. Is óperas suas arregodant is sagras, is ritus màgicus, is traditzionis popularis e is caras de unu pópulu, serrau intra s’antigu e su modernu, intra bandidus e óminis de bona volontadi, intra festas e rinàscidas. Aintrus de s’acontéssiu, in prus de s’ammostu artísticu, s’ant a presentai is líbburus suus in chistionu cun Alessandra Sorcinelli, unu momentu de cunsideratzioni apitzus de istórias e contus de sa Sardigna, bia cun is ogus suus bisadoris. S’atóbiu est unu biaxi intra paesàgius mediterràneus, ritus antigus e cambiamentus modernus, intra fueddus e mudori chi contant s’ànima de s’ísula.
30/10/2024
Serrenti. Is Animeddas - Progetu isperimentali "Studioludo"
Gióbia su 31 de Meseladàmini 2024 in sa Iscola Arrúbia in s’àmbitu de su progetu isperimentali "Studioludo" si fait un’initziativa denominada "Is Animeddas". Podint partetzipai is pipius de s’iscola primària e segundària de 1° gradu e a segunda de su númeru de is iscritzionis is pipius s’ant a pratziri in fàscias de edadi. S’ant a fai giogus de timmi, drucixeddu o brulla, una merenda po s’ispàssiu de totus. Po partetzipai tocat a mandai unu messàgiu whatsapp a su númeru 3459771596 aintrus de lunis su 28 de Meseladàmini, ponendi nómini e sangunau de su minoreddu e sa classi de iscola chi fait.
30/10/2024
Sàrdara. Contribbutu po su trasportu scolàsticu de is disàbbilis.
Su Comunu fait sciri chi si podit presentai sa dimanda po tenni is contribbutus económicus po agiudai is famìllias in s’ organizatzioni de su trasportu scolàsticu de is studiantis disàbbilis, puru non gravis, chi andant in sa scola de s’ infàntzia, primària e segundària de primu gradu. Sa dimanda si podit intregai finztas a su 15 de Donnisantu 2024. Sa noba si podit ligi totu in su giassu de su Comunu in custu link: https://www.comune.sardara.su.it/.../Voucher-per.../
30/10/2024
Sàrdara. Cuncursu.
Su Comunu fait sciri chi nc’est unu cuncursu pùbblicu po esamis po pigai a tempus indeterminau e prenu n. 1 Funtzionàriu Tènnicu (ex istrutori diretivu tènnicu, categoria D, positzioni econòmica D1), de su CCNL Funtzionis Localis de incuadrai in s’ Àrea de is Funtzionàrius e de sa cualificatzioni arta a is sensus de sa Tabella B de su CCNL de su 16/11-/2022, Cualifica Ingegneri.
29/10/2024
Biddacidru. Arregorta de ullieras usadas, torrant is initziativas de su "Lions Club Villacidro Medio Campidano"
Noba pigada de su giassu:www.sangavinomonreale.net "Su Lions Club Villacidro Medio Campidano" ocannu puru torrat a proponni un'initziativa istórica cosa sua: s'arregorta de is ullieras usadas de donai a chini tenit abbisóngiu. Is ullieras ddas mandant in su tzentru de arregorta "Lions" de Chivasso po ddas disinfetai e ddas classíficai. A pustis ddas distríbbuint is voluntàrius de su "Lions" chi si ócupant de s'amparu de sa vista in is Paisus in bia de isvilupu e in Itàlia. In su territóriu cosa nosta, Sud Sardigna, is ullieras usadas si podint portai in assótzius e atividadis cummertzialis diferentis. In Santu 'Èngiu: potecaria Santa Teresa, bia Dante, "Cuccu e Valenti" in bia Roma, "Perrier" in bia Rinascita; "Associazione Anziani Sempre Giovani" in bia Cunventu; "Delegazione ACI" in bia Umberto 38, "Francesca e Cinzia" in bia Trento; "La Flora" in bia Torino 54, "Antichi Rimedi" in bia Roma 2, "Studio de Fisioterapia" in bia Roma 180. In Biddacidru: "Casa della Salute" in bia Guido Rossa; "Ottico Deidda" in bia Nazionale 161. In Seddori: "Vision Ottica" in bia Carlo Felice.